«Челси»нинг зарари катта

Лондон клуби 2022 йил 30 июнь куни якунланган молиявий йилни сарҳисоб қилар экан, клубнинг собиқ хўжайини Роман Абрамовичга нисбатан қўлланилган санкциялар «фавқулодда харажатларга ва фойданинг камайишига» таъсир қилганини маълум қилди. «Челси» Англия ҳукумати томонидан берилган махсус лицензия асосида фаолият юритиши керак эди. Клуб бир қатор соҳаларда, жумладан, чипталар, абонементлар ва товарларни сотиш билан чекланди ва тадбирлар учун буюртмаларни қабул қила олмади, шунингдек, футболчилар ва ҳомийлар билан шартнома имзолай олмади. Клубга қўйилган чекловларга қарамай, даромад 434,9 миллион фунтдан 481,3 миллион фунтга ошди.Товар ёки хизматларни сотишдан тушган даромад 177,1 миллион фунтга кўтарилди. Клуб 2021/22-йилги мавсумда асосий жамоа таркибига 118 миллион фунт стерлинг сармоя киритди ва ўйинчилар савдосидан 123,2 миллион фунт стерлинг ишлаб олди. Лондонликларнинг соф зарари 121,3 миллион фунтни ташкил этди. Бу йилги йўқотиш ва санкциялар туфайли операцион муаммоларга қарамай, «Челси» УЕФА ва АПЛнинг молиявий фейр-плей қоидаларига риоя қилишда давом этишига ишонтирди.