«МЮ»дагиларнинг сабр косаси тўлиб бормоқда

Клуб раҳбарияти ва мураббийлар штаби португалиялик 37 ёшли форварднинг жамоадаги ишига нисбатан муносабатини ўзгартиришини хоҳламоқда. Бу рўй бермаса, клуб келишувни бекор қилиш масаласини кўриб чиқиши мумкин.  Роналдунинг манчестерликлар билан амалдаги келишуви 2023 йилнинг ёзига қадар белгиланган. Аввалроқ, Криштиану «МЮ»нинг мавсум олди йиғинини ўтказиб юборган ва ЕЧЛда иштирок этадиган клубга ўтиш илинжида жамоани тарк этишни истаган эди. «МЮ» АПЛ 2-тур баҳсида «Брентфорд»га 0:4 ҳисобида мағлуб бўлгач, Роналду майдонни тарк этиш арафасида мухлислар олдига бормаган ва тен Хаг билан ҳам кўришмай кийиниш хонасига кириб кетган эди.

Хабарларга кўра, якшанба куни Эрик тен Хаг шогирдларини машғулотга чақирибди. Қўшимчасига ҳар бир футболчини яна 13.8 кмдан югуришга мажбур қилибди. Нима учун айнан шунча масофа? Чунки бир кун аввал «МЮ» футболчилари «Брендфорт» билан ўйинда рақибларидан 13.8 км. кам масофага югуришган экан.

Сўнгги хабарларга кўра, Криштиану Роналду жорий мавсумда Чемпионлар лигасида тўп тепадиган Лиссабоннинг «Спортинг» клубига ўтишдан манфаатдор. Бироқ, бунинг учун у молиявий талабларини сезиларли даражада камайтириши керак бўлади. Ҳозир у «МЮ»да йилига 30 миллион еврога яқин маош олади ва Португалия клуби унга бу суммани тўлай олмайди.