Ибра операция қилинди, яна 7-8 ойни ўтказиб юборади

Клуб расмий сайти хабарига кўра, «Милан» ҳужумчиси 25 май куни чап оёқ тиззасидан жарроҳлик амалиётини ўтказган. Златан тизза бўғимлари ва хочсимон пайларидаги муаммолар сабабли операция столига ётишга мажбур бўлган. Қайд этилишича, жарроҳлик амалиёти муваффақиятли ўтган ва 40 ёшли ҳужумчининг сафга қайтиши учун 7-8 ой вақт талаб этилади. Операцияга қарамай, «Милан» клуби Златан билан келишувни яна бир йилга узайтирадиган бўлди.

Инсайдер Николо Скиранинг ёзишича, 40 ёшли швециялик форвард «Милан» раҳбарияти билан 2023 йилга қадар мўлжалланган шартнома бўйича келишувга эришди. Янги келишувга кўра футболчининг йиллик маоши 2,5 миллион еврони ташкил этади. Маълумот учун, Ибрагимович жорий мавсум «А» серияда 23 учрашувда 8та гол ва 3та ассистга муаллифлик қилиб, 11 йилдан кейин «А» серия чемпиони бўлди.