Маълумот; ЖЧ-2026 саралаши тартиби

Маълумот; ЖЧ-2026 саралаши тартиби

Осиё футбол конфедерацияси (ОФК) 2026 йили АҚШ, Канада ва Мексикада ўтказиладиган жаҳон чемпионати саралаш босқичлари формуласини маълум қилди.

Эслатма, бўлжак мундиал учун ОФК таркибидаги жамоаларга 8,5та («8+1» шаклида) йўлланма ажратилган. Хўш, чипталар қандай ўйналади? Демак, Осиё ва Асвтралия миқёсидаги саралаш тизимига кўра, миллий жамоаларни олдинда 5та бос­қичдан иборат мураккаб довон кутмоқда.

Биринчи босқич. ФИФА рейтинги бўйича ОФКнинг энг паст кўрсаткичга эга 22та миллий жамоаси 11та жуфтликка ажратилади. Жуфтликларда ғалаба қозонган жамоалар кейинги раундга чиқади.

Иккинчи босқич. ФИФА рейтинги бўйича ОФКнинг энг яхши кўрсаткичга эга 25та миллий жамоаси ва биринчи босқичда ғолиб чиққан 11та терма қатнашади. Яъни жами 36та жамоа 9та гуруҳга бўлинади (4тадан, албатта). Гуруҳ ўйинлари икки даврали тизимла олиб борилади ва якунда ҳар бир квартетдан 2та етакчи жамоа (жами 18та) кейинги раундга кўтарилади. Иккинчи босқич ўйинлар 2023 йил ноябрь - 2024 йил март ва июнь ойларида ўтказилади. Ўзбекистон миллий жамоаси ўз иштирокини шу босқичдан бошлайди.

Учинчи босқич. 18та жамоа 3та гуруҳга ажратилади. Яъни 6тадан жамоани ўз ичига олган гуруҳлар шакллантирилади. Якунда ҳар бир гуруҳда 1-2-ўринларни эгаллаган жамоалар (жами 6та) ЖЧ-2026 йўлланмасига эга бўлади. Учинчи раунд ўйинлари 2024 йил сентябрь - 2025 йил март ойи оралиғида ўтказилади. 3та гуруҳда 3-4-ўринларни банд этган 6та жамоа курашни кейинги босқичда давом эттиради.

Тўртинчи босқич. 6та жамоа тенг иккига бўлинади -  3та иштирокчидан иборат 2та гуруҳ. Якунда гуруҳ ғолибларига ЖЧ-2026 йўлланмаси тақдим этилади. 2-ўрин соҳиблари эса қитъа миқёсидаги охирги босқичга чиқади.

Бешинчи босқич. 2та жамоа ўзаро 1та ўйинда қитъалараро «плей-офф»га чиқиш ҳуқуқини берувчи яримта йўлланма тақдирига ойдинлик киритади.

Эслатма, 2026 йилги жаҳон чемпионати тарихда илк марта 48та миллий жамоа иштирокида ўтказилади. Мусобақа формати ҳозирча расман тасдиқланмаган