Ҳусанов Италияга кўчиб ўтишга яқин

Яқиндагина АПЛ жамоалари ортидан "ПСЖ" ва "Атлетико" ҳам 21 ёшли легионеримизга қизиқаётгани ҳақида хабарлар чиққанди. Дейлик, Мадрид клуби бу трансферга 20 миллион евро ажратмоқчи.

Энди "А" сериянинг бирданига 3та катта жамоаси - "Ювентус", "Наполи" ва "Интер" ҳам Ҳусанов учун курашга қўшилди. Буни машҳур агент Жорже Мендеш тасдиқлади. Унинг таъкидлашича, итальянлар легионеримиз трансферини 25 млн. еврога баҳолашмоқда. Ҳаттоки, бу масалани ҳал қилиш учун Абдуқодирнинг отаси Ҳикмат Ҳошимов ва унинг агенти Европага йўл олишгани хусусида хабарлар бор. 

Асосийси, Ҳусанов катта эътибор фонида хотиржамликни сақлаб қолмоқда. Фарнция чемпионати 14-туридан ўрин олган "Ланс" - "Монпелье" ўйини (2:0)да тўлиқ вақт тўп сурган ҳамюртимиз якунда Лига 1 томонидан учрашувнинг энг яхши футболчиси сифатида эътироф этилди. "Абдуқодир Ҳусанов — сизнинг ўйиндаги энг яхши футболчингиз", — дея ўзбек тилида ёзилди Лига 1нинг "Инстаграм"даги саҳифасида. Sofascore портали ҳам "Ланс" ва "Монпелье" ўртасидаги ўйинда энг юқори баҳони айнан Абдуқодир Ҳусанов ва Кевин Дансога берди - 7,8 балл. Умуман, Ҳусанов бир қатор кўрсаткичлар бўйича Лига 1 ҳимоячилари орасида етакчилик қилмоқда.