Эрлинг, гўзал хоним билан «дуэл»га тайёрлан!

Германиялик хоним югуриш бобида норвегиялик ҳужумчини бемалол ортда қолдиришини таъкидламоқда. Умуман, у Эрлинг билан беллашиб кўришга тайёр.

Тўғри, турли манбалар томонидан энг латофатли енгил атлетикачи сифатида тан олинган Алиса Шмитд ўз-ўзидан луқма ташлагани йўқ футбол юлдузига. Ҳаммасига Алисадан югуриш бўйича Эрлингга бас кела олиш-олмаслиги ҳақида сўрашган Dagbladet (Норвегия) нашри журналистлари айбдорлар. «Буни билмайман, эҳтимол, беллаша оларман. Ўйлашимча, 400 метр масофага югуришда буни уддалашим мумкин. Лекин 200 метр масофада уни ортда қолдириш қийин-ов, - дея жавоб берди Алиса Будапештда ўтказилаётган енгил атлетика бўйича жаҳон чемпионатида. - Агар бундай пойга ташкиллаштириш имкони топилса, фақат хурсанд бўлардим. Эрлинг билан қачон мусобақалашим мумкин? Билмайман, ўзидан сўраш керак, лекин мен ҳар доим тайёрман». 

Айтганча, Алиса 2020 йили «Боруссия» Д. фитнес-мураббийи ролида ишлаган ва марказий ҳимоячи Матс Хуммельс билан 400 метр масофага югуриш бўйича мусобақалашиб, уни ортда қолдирган. Маълумот учун, Эрлинг­нинг максимал тезлиги соатига 22,5 мил атрофида. Шмидт эса 400 метр масофани 55 сонияда босиб ўтган. 

- 400 метр масофага югуришда қай биримиз устун эканлигимизни билишни истардим... Алиса Шмидт (германиялик енгил атлетикачи).