Фақат Кунде қолди...

Ла Лига расмий сайтида кеча тунда ҳимоячи Андреас Кристенсен, ярим ҳимоячилар Рафинья ва Франк Кессье, шунингдек, ҳужумчи Роберт Левандовски «кўк-анорранглилар» футболчиси сифатида рўйхатга олингани ҳақида маълумот пайдо бўлди. Олдинроқ «Барса» «Райо Вальекано»га қарши Ла Лиганинг 1-тур учрашуви учун 5 нафар янги футболчидан 4 нафарини рўйхатдан ўтказиши ҳақида хабар берилганди. Ла Лига Каталония клубининг тўртинчи иқтисодий дастагини фаоллаштиришини маъқуллади, бу эса унга жамоага янги келганларни рўйхатга олиш имконини берди. Фақат ҳимоячи Жюль Кунде «Райо» билан ўйин учун қайдномадан четда қолди. Бунинг учун каталонияликлар қўшимча равишда 20 миллион евродан кўпроқ даромад олишлари керак. Франциялик футболчи соғлиғидаги бироз ноқулайлик туфайли барибир «Райо» билан ўйин учун таркибга киритилмаган бўларди. «Кўк-анорранглилар» бугун, 13 август куни «Райо Вальекано»ни ўз майдонида қабул қилади.