Пеле портрети учун ярим миллиондан кўп!

Савдога афсонавий Пеле портрети ҳам қўйилганди ва уни Килиан Мбаппе сотиб олди. «Қирол» номли картинанинг бошланғич баҳоси 5 минг евро эди, якунда Франция миллий жамоаси ҳужумчиси суммани 520 минг еврога кўтариб, портрет соҳибига айланди.

Аввало, айтиш керак, ушбу аукциондан тушган маблағ тўлиқ хайрия ишларига сарфланади. Энди «Қирол» номли Пеле портретига тўхталсак, бошидан ушбу ижод намунасига 6 нафар футболчи даъвогарлик қилди. Картинанинг баҳоси 5 мингдан 300 минг еврога кўтарилгач, савдога Килиан Мбаппе ва Ашраф Ҳакими ҳам қўшилишди. Якунда «ПСЖ» билан хайрлашишга улгурган Килиан портрет суммасини 520 минг еврога кўтариб, марокашлик футболчидан устун келди. Умуман, аукционда жами 2,7 млн. евро йиғилди. 

Бу вақтда 25 ёшли Килиан Мбаппенинг «Реал»да қанча топиши ҳақида маълумотлар чиқа бошлади. Дейлик, Sky Sports нашрида ёзилишича, «Мадрид» билан 5 йиллик шартнома тузадиган франциялик ҳужумчи жами 75 миллион евро (йилига 15 миллион) миқдорида маош олади. Бу «ПСЖ» тўлаган маошдан кам. Лекин «Қироллик клуби» Килианга шартнома тузгани учун бонус сифатида нақ 150 миллион евро ажратади. Умуман, кутилишича, Мбаппенинг «Реал»га ўтгани июнь ойида расман эълон қилинади.

Британиянинг Bonhams аукцион уйи Лионель Месси «Барселона» билан илк шартномасини имзолаган қоғоз салфетка 762400 фунт стерлинг (965 минг доллар)га сотилганини маълум қилди. Кимошди савдоси 2000 йилнинг 14 декабрь куни расмийлаштирилган Месси ва «Барса» келишувида иштирок этган агент Орасио Гажиоли томонидан ўтказилди. Салфеткада 13 ёшли Лео, Гажиоли, яна бир агент Хосеп Мария Мингелла ва ўша пайт Каталония клуби спорт директори лавозимида ишлаган Карлес Рексач имзолари бор. Маълумот учун, ушбу буюм 300 минг фунт ёрлиғи (бошланғич қиймат) билан савдога қўйилганди.