Ўйиндан сўнг ҳужумчи Рандаль Коло-Муани, вингер Усмон Дембеле, шунингдек, ҳимоячилар Ашраф Ҳакими ва Левен Курзава «Марсель» шаънига ҳақоратли сўзлар ёғдиришган. Ҳакам ҳуштаги янграгач, футболчилар мухлислар томонга йўл олишди. Ярим ҳимоячи Уоррен Заир-Эмери мегафонни олиб, мухлислар билан бирга қўшиқ куйлаган. У тарафдан ҳеч қандай ёмон сўзлар янграмаган, бироқ видеога Коло-Муани, Дембеле, Ҳакими ва Курзаванинг ҳақоратли сўзлар ишлатиб, бақираётгани тушиб қолган. Le Parisien нашрининг хабарига кўра, Лига 1 интизомий иш очади ва видеолавҳаларни текширади. Агар «ПСЖ» футболчиларининг айби исботланса, улар жазоланади. Жазо турларидан бири - бу дисквалификация. Маълумот ўрнида, 2011 йилда «Марсель» ҳимоячиси Тае Тайво «Монпелье»га қарши баҳсдаги ғалабадан сўнг, томошабинларга қарата ҳақоратли сўзлар ишлатгани учун 1та ўйинга четлатилган.