РЕЙТИНГ: Қимматбаҳо афсоналар

Масалан, «ПСЖ»  2017 йилда Неймарни ўз таркибига жалб этиш учун жаҳон рекордига тенг маблағ сарфлади. Қуйидаги материал ўз фаолияти давомида энг кўп маблағли келишувларга сабабчи бўлган футболчилар ўнлигига бағишланган.

10. Златан Ибрагимович - 169,1 млн. евро

«Аякс», «Ювентус», «Барселона», «Милан», «Интер», «ПСЖ», «МЮ»... Ибранинг етакчи ўнликдан жой олиши бежиз эмас. Швециялик афсона нафақат топ-клублар, балки миллий терма жамоада ҳам доимо ёрқин ўйин кўрсатган ва трансфер бозорида серхаридор футболчилар сафидан жой олган.

9. Анхель Ди Мария - 179 млн. евро

2007 йилда 8 млн. евро эвазига «Росарио Сентралдан «Бенфика»га ўтган Ди Мария ҳам ноёб иқтидорини намо­йиш этиб, 2010 йилда «Реал»­ни 33 млн. евро сарфлашга мажбур этганди. 4 йилдан кейин у билан таркибни кучайтиришга аҳд қилган «МЮ» трансфер бобида Британия рекордини ўрнатди. Аргентина мундиалининг ғолиби «ПСЖ» ва «Ювентус»даги фаолиятдан кейин, шу йилнинг ёзида «Бенфика»га қайтди.

7-8. Килиан Мбаппе - 180 млн. евро

Ноёб иқтидор соҳиби дастлабки трансфернинг қиймати билан рейтингда етакчи квартетдан жой олди. 2016|17 йиллар мавсумида «ПСЖ»га ижарага берилган «Монако» ҳужумчиси ҳозирга қадар 260та беллашувда 212та гол уриш билан ўзига сарфланган харажатни тўла оқлади.

7-8. Антуан Гризманн - 180 млн. евро

2014 йилда 30 млн. евро эвазига «Реал Сосьедад»ни «Атлетико»га алмаштирган франциялик футболчи Диего Симеоне раҳбарлигида энг сермаҳсул (257 ўйин, 133 гол) ҳужумчилардан бирига айланди. 2019 йилда «Барса» уни 120 млн. еврога харид қилди. Лекин кейинчалик молиявий муаммолар туфайли 2021 йил августида 20 млн. еврога «Атлетико»га сотиб юборди.

6. Филиппе Коутиньо - 180,3 млн. евро

Миланнинг «Интер»идан атиги 13 млн.га харид қилинган бразилиялик футболчини «Ливерпуль» 5 йилдан кейин 122 млн.га «Барселона»га пуллаганди. Бироқ терма жамоа аъзоси «Камп-Ноу»да ишончни оқлай олмади ва ижара асосида «Бавария»га ўтиб кетди. 2019|20 йиллар мавсумида у мюнхенликлар сафида «Барса»га 2та гол ургач, клуб ҳамкорликни тўхтатди. Шундан кейин Коутиньо «Астон Вилла»га йўл олди. Лекин Унаи Эмери унга етарли ишонч билдирмади. Натижада бразилиялик плеймейкер сентябрь бошида Қатар пойтахти Дохага кўчиб ўтди - «Ал-Духайл» клуби билан бир йиллик ижара шарт­номаси тузди.

5. Альваро Мората - 189 млн. евро

Энг буюк кўчманчилардан бири мақомини олган Мората номдор грандлар таркибида ўз омадини синаб кўрди. «Реал» академиясида таҳсил олган ҳужумчини 2014 йилда «Ювентус» 20 «лимон»га харид қилганди. Орадан 2 йил ўтгач, мадридликлар уни келишув бандига асосан қайтариб олишди. Кейин Альваро «Челси»да омадсизлик азобини тотиб кўрди ва 2020 йилда «Атлетико» уни 35 млн. эвазига ўз сафига қўшиб олди. 2020|21 йиллар мавсумини ижара асосида «Ювентус»да ўтказган 30 ёшли ҳужумчи ўтган йил июнига қадар Турин клубида бўлиб, кейин Испанияга қайтди.

4. Усмон Дембеле - 220 млн. евро

Ёш иқтидорларни синчковлик билан кузатиб юрадиган «Боруссия Дортмунд» 2016 йилда Дембелени «Ренн»дан 13 млн. фунтга сотиб олганди. Бир йилдан кейин у билан Неймар ўрнини тўлдиришга қарор қилган «Барселона» 135,5 млн. фунтдан воз кечди. Сўнгги йилларда Усмон жароҳатлар гирдобида қолган бўлсада, тез орада саломатлигини тиклаб олди ва ёзда «ПСЖ»га ўтиш эвазига 50 млн. евро даромад келтирди.

3. Криштиану Роналду - 247 млн. евро

Лиссабоннинг «Спортинг»идан 19 млн. евро эвазига «МЮ»га ўтган Роналду дунёдаги энг яхши ўйинчилар сафига кўтарилди. Кейин «Реал» уни Испанияга таклиф этди. Вингер эса барча турнирлардаги 438 учрашувда 450та гол уриш билан 94 млн. евро беҳуда кетмаганлигини исботлади. Кейин Роналду Ла Лиганинг 2 карра чемпиони ва ЕЧЛ­нинг 4 карра ғолиби сифатида 2018 йилда «Ювентус»га йўл олди ва «Бланкос»га 117 млн. даромад келтирди. Ке­йин у 17 млн. евро баҳосида яна «МЮ»га, ўтган йил декабрида эса Саудияга равона бўлди.

2. Неймар - 310 млн. евро

«Сантос»даги фаолиятидан кейин Неймар 2013 йилда 88 млн. евроли келишувга асосан «Барселона» аъзосига айланди ва қисқа вақт ичида Лионель Месси ҳамда Луис Суарес билан ўта сермаҳсул учликни ташкил этди. 2017 йил ёзида ҳужумчини ўз сафига қўшиб олишни мақсад қилган «ПСЖ»ни 220 миллионли баҳо ҳам тўхтата олмади. Жаҳон рекорди мақомидаги харид бутун Европани шок ҳолатига туширди, «Барса»ни эса қарз­га ботирди. Жорий мавсумда «Ал-Ҳилол» шарафини ҳимоя қилаётган ҳужумчи учун Саудия клуби 90 млн. евро таклиф этганди.

1. Ромелу Лукаку - 339,2 млн. евро

2011 йилда «Андерлехт»дан 15 млн. еврога «Челси»га ўтган ҳужумчи 2014 йилда «кўклар»га 20 млн. фойда келтирган ҳолда «Эвертон» сафидан ўрин олди. 2017 йилда эса 84,7 млн. евро эвазига «МЮ» Ромелуни ўз сафига қўшиб олди ва бир йилдан кейин «Интер»­га 74 миллионга сотиб юборди. 30 ёшли ҳужумчи миланликлар сафида 95та ўйинда 64та гол уриб, унга тош отаётган танқидчилар оғзини юмди. Шундан кейин «Челси» уни «Стэмфорд Бриж»га қайтариш учун 113 млн. сарфлади. Лекин Бельгия терма жамоасининг ҳужумчиси аввалги сермаҳсул ўйинни кўрсата олмади. Ҳозирда «Рома» сафида ижара асосида ўйнамоқда.

А.АҲМЕДОВ тайёрлади