Дортмунднинг «Боруссия» клуби раҳбарияти 34 ёшли ҳужумкор ярим ҳимоячи Марко Ройс билан шартномани узайтиришни мақсадга мувофиқ деб ҳисобламайди.
Bild нашри хабарига кўра, «асаларилар» босслари айни дамда Ройс фақат «ўнлик» позицияда фойдали бўлиши мумкинлигига ишонишади ва унинг ўрнига ёшроқ футболчини қўйиш янада оқилона вариант бўлади, деб ўйлашади. Қайд этилишича, «Боруссия» Ройсга маъмурий лавозим таклиф қилиб, уни клубда сақлаб қолиш ниятида. Аввалроқ ОАВда германиялик футболчи футболчилик фаолиятини давом эттирмоқчилиги ва «Боруссия» унинг меҳнат шартномасини узайтирмаса, бошқа клубга ўтиш вариантини кўриб чиқаётгани ҳақида маълумотлар пайдо бўлганди. Ройс 2012 йилдан бери дортмундликлар сафида ўйнаб келмоқда. Бу даврда у барча турнирларда 411та учрашувда қатнашиб, 167та гол ва 124та голли узатмани амалга оширган.
