ЖЧ-2024 (футзал): Байрамнинг энг юқори нуқтаси!

Ўйлаймизки, йирик анжуманга мезбонлик вазифаси аъло даражада уддаланди ва мундиал иштирокчилари Тошкент, Бухоро ҳамда Андижонга сафарларини узоқ вақт илиқ энтикиш билан эслаб юришади. Айниқса, ФИФА президенти Жанни Инфантино ва Ўзбекистон Республикаси бош вазири Абдулла Арипов кўз ўнгида 6-марта футзал олами тахтига кўтарилган бразилияликлар ортга катта таассуротлар билан қайтишлари турган гап. Ахир улар финалда мамлакатнинг ҳам футбол, ҳал футзалда асосий рақиби саналган Аргентина вакилларини доғда қолдиришди.

*** 38 ёшли Лео Игита чорак финалда Қозоғистон термаси сафида юбилей - 100-ўйинини ўтказди. Асли бразилиялик бу футзалчи фаолияти давомида нақ 5 марта дунёнинг энг яхши дарвозабони сифатида тан олинганини алоҳида таъкидлаш жоиз. 

*** Қозоғистон - Аргентина ўйинини «Ҳумо-Арена»да 9357 мухлис кузатиб борди. Бу - ЖЧ-2024 рекорди. Ўзбекистон - Парагвай учрашуви 9081 мухлис тўплаганди. Футзал мундиали тарихида эса атиги 2та ўйинда мухлислар сони кўпроқ бўлган: ЖЧ-2008 финали (Бразилия - Испания)ни Рио-де-Жанейрода 10082 ва ЖЧ-1996 финали (Бразилия - Испания)ни Барселонада 15500 мухлис бевосита кузатган. 

*** Ҳамюртимиз Анатолий Рубаков ярим финалдан ўрин олган Аргентина - Франция ўйинида вақтга масъул ҳакам сифатида ишлади. 

*** Футзал афсонаси Фалькао финал арафасида Тошкенттга келди. Аргентиналик футбол юлдузи Хавьер Савиола эса ярим финал олдидан ўз ҳамюртлари билан учрашди. 

*** Футзал мундиали тарихида финал ўйини илк марта «Жанубий Америка дербиси»га айланди. 

*** Аргентина термаси қаторасига 3-марта мундиал финалида ўйнади.

*** Украина термаси тарихда илк марта ЖЧ бронза медалини қўлга киритди.

3-ЎРИН УЧУН

6 октябрь

УКРАИНА - ФРАНЦИЯ - 7:1 (1:0)

Тошкент. «Ҳумо-Арена». 4890 томошабин.

Бош ҳакам: Даниэль Родригес (Уругвай).

Голлар: Чернявский (10), Зварич (21), Жук (26, 27), Абакшин (29, 29, 32).

Украина (бошланғич бешлик): Сухов, Швед, Жук, Чернявский, Зварич.

Захира: Корсунь, Мельник, Семенченко, Абакшин, Фаренюк, Ципин, Савенко, Микитюк.

Франция: (бошланғич бешлик): Гаррос, Белхаж, Саадау, Муҳуддин, М.Туре.

Захира: С.Туре, Менендес, Лутин, Муҳаммад, Гуирио, Лококо, Рамирес, Чапчет, Бендали.

ФИНАЛ

6 октябрь

БРАЗИЛИЯ - АРГЕНТИНА - 2:1 (2:0)

Тошкент. «Ҳумо-Арена». 9029 томошабин.

Бош ҳакам: Алехандро Мартинес (Испания).

Голлар: Феррао (5), Рафаэль (12).

Бразилия (бошланғич бешлик): Виллиан, Марлон, Марсель, Диего, Рафаэль.

Захира: Гитта, Ронкальо, Негуиньо, Марченио, Лино, Пито, Феррао, Артур, Валерио.

Аргентина: (бошланғич бешлик): Сармьенто, Таборда, Клаудиньо, Брэнди, Арриета.

Захира: Кравецкий, Плаза, Корса, Триподи, Алемани, Роса, Гауна, Борруто, Вапораки.

ТЎПУРАРлар:

Марсель (Бразилия) - 10та

Абакшин (Украина) - 7та

Арриета (Аргентина) - 7та

Брэнди (Аргентина) - 7та

Агапур (Эрон) - 6та...

ФУТЗАЛ БЎЙИЧА ЖЧ ҒОЛИБЛАРИ

1989 - Бразилия

1992 - Бразилия

1996 - Бразилия

2000 - Испания

2004 - Испания

2008 - Бразилия

2012 - Бразилия

2016 - Аргентина

2021 - Португалия

2024 - Бразилия

ЖЧ-2024 лауреатлари

«Олтин бутса» (энг яхши тўпурар) - Марсель (Бразилия) 

«Олтин қўлқоп» (энг яхши дарвозабон) - Виллиан (Бразилия)

«Олтин тўп (энг яхши футзалчи) - Диего (Бразилия)

«Фэйр-плей» («Ҳалол ўйин» - Португалия термаси

ЖЧ-2024 мукофот жамҒармаси

Бразилия (чемпион) - 250 минг доллар

Аргентина (вице-чемпион) - 150 минг доллар

Украина (3-ўрин) - 100 минг доллар

Франция (4-ўрин) - 75 минг доллар

Венесуэла, Марокаш, Қозоғистон, Парагвай (чорак финал) - 60 минг доллардан

Бошқа иштирокчилар - 40 минг доллардан

ФУТЗАЛ ОЛИМПИАДА ЎЙИНЛАРИ ДАСТУРИГА КИРИТИЛАДИМИ?

ФИФАнинг «2023-2027 йилларда глобал футболнинг стратегик мақсадлари» номли ҳужжати интернетда чоп этилди. Унда футзал ва пляж футболини Олимпиада дастурига киритиш режаси битилган. «Дунё миқёсида иштирок этиш даражасини инобатга олган ҳолда, ФИФА бўлажак олимпия ўйинларида футзал ва пляж футболини алоҳида спорт йўналишлари сифатида ҳисоблашни таклиф этади», — дейилади ҳужжатда. Футзал ҳозирча ўсмирлар ўртасидаги Олимпиада-2026 дас­турига киритилган.

ФИФА ПРЕЗИДЕНТИ ТАШРИФИ

ФИФА президенти Жанни Инфантино футзал бўйича ЖЧ-2024 финалини бевосита кузатиш ҳамда ташкилий қўмита томонидан амалга оширилган ишлар билан яқиндан танишиш мақсадида 6 октябрь куни юртимизга келди. ФИФА делегациясини Тошкент халқаро аэропортида спортимиз раҳбарияти кутиб олди. Олдинроқ жаҳон футболи раҳбари Ўзбекистон кубоги финалини кўриш учун Фарғонага ҳам ташриф буюриши мумкинлиги ҳақида хабарлар тарқалганди. Бироқ бу маълумот тасдиғини топгани йўқ.