«Барселона» президенти Жоан Лапорта Foros de Vanguardia форумидаги чиқишида клуб атрофидаги барча долзарб масалалар юзасидан батафсил баёнот берди. Барселонадаги MGS залида ташкил этилган тадбирда La Vanguardia, Mundo Deportivo ҳамда RAC1 нашрлари вакиллари ҳам иштирок этишди. Шу тариқа Лапортанинг кескин мурожаатларга бой баёноти интервью шаклида кенг жамоатчиликка етказилди.

«Барселона» президенти лавозими учун бўладиган сайлов юзасидан:

– Клуб низомига мувофиқ, навбатдаги сайлов жараёни 2026 йилнинг 15 март – 15 июнь оралиғида бўлиши керак. Албатта, ушбу муҳим воқеликни белгиланган вақтда ўтказиш ҳаракатидамиз. Ўйлайманки, январь ойи охирига қадар барча учун энг мақбул санани аниқлаймиз. Низом клубни бошқарадиган энг юқори меъёр эканлигини айтишим жоиз. Барчасини Socios гуруҳи ва клуб аъзолари овоз бериш йўли билан тасдиқлашади. Низомга кўра, муайян киши «Барса» президенти лавозимига кетма-кет икки муддатга сайланиши мумкин, лекин учинчисига рухсат йўқ. Ўзимдан Путин ёки Мадуро ясамоқчи эмасман. Назарий жиҳатдан қарасак, бир цикл танаффус олиб, кейин номзодимни яна илгари суришим имконияти бор. Аммо айни пайт бундай режа ҳақида ўйламаяпман. Ёшим имкон бермайди…

«Айнтрахт» мухлисларининг «Камп Ноу»даги тартибсизликлари юзасидан: 

– Афсуски, германиялик мухлислар билан боғлиқ салбий тажрибамиз тобора кўпаймоқда. Уларнинг ўйинларга катта гуруҳ бўлиб ташриф буюришлари – яхши, аммо стадионга кириш учун турли ҳийла-найрангларни ишга солишлари – ёмон. Хусусан, «Айнтрахт» мухлислари «Камп Ноу»да ҳам меҳмон жамоа тарафдорларига ажратилган трибунадан четга чиқиб кетишди. Муҳими, бу сафар келажакда шундай кўнгилсизликларга қайта дуч келмаслик учун дарҳол тегишли чораларни кўрдик. Масалан, чипталар «қўл»да сотилишига қарши алоҳида тизим ишлаб чиқдик.

Spotify Кamp Nou аренасига қайтиш босими юзасидан:

– Очиғи шахсан мен бу борада қандайдир босим сезганим йўқ. Аксинча, клубнинг ҳар бир ходимида ғайрат ва сабр-тоқат кўрдим. Жамоамизга қайғурадиган ходимлар баралла қўллаб-қувватлашди: «Жаноб президент, ҳаммасини хотиржамлик билан мукаммал тарзда бажаринг, чунки барчамиз бетакрор «Камп Ноу»ни янгича қиёфада кўриш ва ундан лаззат олишни хоҳлаймиз». Ўз ўрнида айтишим жоиз, стадионни белгиланган муддатда фойдаланишга топшириш масаласига доир кечикишларда қурувчи ташкилотнинг айби йўқ. Шунчаки, лицензия олиш, қурилиш жараёнини уч сменада ташкил этиш, қўшимча ишчилар ёллаш билан боғлиқ ҳолатларда муаммолар кузатилди. Қисқаси, қурилиш компаниясининг ўзи билан ҳеч қандай тушунмовчилик ёки камчилик рўй бермади.

Лионель Мессига ҳурмат юзасидан:

– Месси нафақат «Барселона», балки бутун тарихдаги энг буюк футболчи, албатта. Табиийки, унга чиройли ва унутилмас ҳурмат ифодасини тақдим этамиз. Шунингдек, стадион атрофига «Барса» тарихини белгилаб берган – Кубала, Кройфф ва Ронал­диньо каби бошқа афсоналар шарафига ҳам ҳайкаллар ўрнатмоқчимиз. Клубимиздан қачондир Лео даражасида ёки ундан ҳам кучлироқ футболчи чиқиши мумкинми? Буни ҳамма хоҳлайди. Лекин ҳозир баҳс-мунозараларга сабаб бўладиган тахминлардан тийилиб турганимиз маъқул. Месси «Камп Ноу» олдида ўз сиймосини ўрнатишимизга розилик бергани бўйича ҳеч қандай аниқ гап йўқ, ҳайкал дизайни ва кўриниши ҳам ҳали ҳал этилмаган. Аммо ишонтириб айтаман, яқин келажакда Леога муносиб тарзда ҳурмат кўрсатилади, албатта. Стадионга унинг номини бериш? Олдинроқ бу ғоя муҳокама қилинган, лекин ўринли таклиф сифатида кўриб чиқилмаган. Чунки одатда стадион марҳум футболчилар шарафига номланади. Месси президент сайловига таъсир кўрсатиши мумкинми? Билмадим, бу унинг ўзига бериладиган савол…

Ҳамкорлик ва ҳомийлар юзасидан:

– Бошқарувга келганимизда, олдинги раҳбарият қолдирган мерос шу даражада ҳалокатли кўринишда эдики, «Барселона» деярли инқироз ҳолатида турганди ҳатто. Муҳими, тезкор чора-тадбирлар воситасида бир қатор ишларни амалга оширдик. Жумладан, камомадни Socios елкасига юкламаслик учун ассоциатив клуб моделини сақлаб қолишга эътибор қаратдик. Шуни ишонч билан айтаманки, ҳозирда ҳомийлик келишувларимиз ягона тижорий стратегия асосида расмийлаштирилмоқда. Бунга Spotify ёки Nike билан тузилган шартномалар яққол мисол. Барча келишувлар Compliance департаменти томонидан синчиклаб текширилади. Чунончи, шартлар клуб қадриятлари ва амалдаги меъёрларга мос келиши шарт. Хуллас ҳаммаси тўлиқ назоратда. Албатта, келишувлар кимгадир ёқади, баъзиларга йўқ. Масалан, Конго ДР билан тузилган битим ортидан катта маблағ ишлаяпмиз, тўғри, мамлакатнинг ўзи иқтисодий мураккаб даврни бошдан кечирмоқда. Ҳозирда энг асосий ишимиз – қарзнинг оғир юки ва бюджет камомадини қисқартириш. Шундай йўл тутишга мажбурмиз. Хотиржам бўлинг, ушбу молиявий ҳаракатларимизда ҳеч қандай ҳуқуқбузарлик йўқ. Барча битимлар ас­самблея томонидан тасдиқланган.

Келгуси трансферлар юзасидан:

– Тан оламан, баъзи позицияларни кучайтириш учун янги футболчиларга муҳтожмиз. Лекин спорт директори Декунинг ишлари январь ойи­га қараганда, июнда кўпроқ бўлади. Ҳатто топ-даражада трансфер қилишга ҳам тайёрмиз. Фақат эҳтиёж туғилган тақдирдагина харидлар учун маблағ ажратилади. Акс ҳолда, деразадан ташқарига пул сочишдан нима маъно…?

«Негрейра иши» юзасидан…

– «Реал»га қарашли телеканал нималар билан шуғулланаётганига бир эътибор қаратинг… Бу – «Барселона» тарихидаги энг кучли жамоа­ни обрўсизлантириш ҳаракати эмасми? Ваҳоланки, ўша даврдаги «Барса» ўз ўйини билан бутун дунё диққатини тортган эди. Буни ҳамма билади. Ўша вақт кўплаб клублар худди «Барса» каби ўйнашга интилгани бежиз эмасди ахир. Хуллас, «Мадрид» «Нег­рейра иши»ни кўтариб чиқиб, жамоамизнинг бемисл гегемония даврига соя солишга уринмоқда қандайдир беъмани сабаблар билан. Очиғи, ўтмишда нималар юз берганидан қатъий назар, ҳеч кимдан узр сўраш ниятида эмасман. Чунки агар шундай қилсам, ўзини оқлашга уринаётган айбдор одамга ўхшаб қоламан. Ҳозирда юз бераётган можаролар бўйича ягона хулоса билдириш сўралса, баралла айтаманки, тарихдаги энг яхши жамоага қарши туҳмат кампанияси олиб борилмоқда, шубҳасиз. Мен эса клубнинг ажойиб даврини обрўсизлантиришга ҳаракат қилаётганлар билан охиригача курашмоқчиман.

Ла Лига президенти Хавьер Тебас билан муносабатлари юзасидан:

– Тебасни лавозимидан озод қилиш кераклиги ҳақида бонг ураётганларга умуман ишонмайман. Чунки аслида у «Реал Мадрид»нинг етарли ҳимоясига эга. Ҳа, кимдир бу фикримга қарши Ла Лига раҳбари ва Флорентино Перес ўртасида кучли зиддият борлигини айтиши мумкин. Лекин аслида ҳар иккиси «Қироллик клуби» одамидир. Ҳа, ҳозир «Барса» ва Ла Лига ўртасидаги муносабатлар ҳам яхши. Чунончи, мавжуд қоидаларни биламиз, уларни қандай талқин қилиш кераклигини ҳам тушунамиз. Майамида ўтказалиши режалаштирилган ўйин бекор қилинганига келсак, шахсан мен учун АҚШга учишдан кўра, Вильярреалга автомобилда бориш маъқулроқ. Бу борада шунчаки, хорижда ўйин ўтказиш билан Ла Лига тар­ғиботига ёрдам беришни хоҳлагандик, холос.

Флорентино Перес билан муносабатлари юзасидан:

– Биринчи президентлик муддатим давомида Флорентино анча курашувчан кайфиятдаги раҳбар эди. Ҳатто у билан Это~О масаласида келишмовчиликка ҳам боргандик. Аммо ҳозир ўзаро муносабатларимиз анча ўзгарган ва расмий мулоқотлар доирасида ҳаммаси тўғри йўлга қўйилган. Айтиш керак, Перес ўз фикрлари ва ғоялари йўлида курашадиган шахс. У қарор қабул қилувчиларга босим ўтказиш қудратига эгами? Албатта. «Барселона» ҳам шундай. Лекин бу ўз ваколатини су­истеъмол қилиш эмас. Демоқчиманки, ҳар доим маълум бир талқин устун келади. Аммо нуқул бир тарафнинг фикри устун кўрилиши ҳақидаги гаплар нотўғри…

«Барселона» раҳбарияти ўтган йили ноябрь ойи ўрталарида унча танилмаган Zero-Knowledge Proof компанияси билан келишувга эришганини эълон қилганди. Ўшандаёқ шартнома шубҳа уйғотганди ва охир-оқибат, Каталония клуби ушбу технологик блокчейн-ҳамкордан воз кечди. La Vanguardia нашри хабарида айтилишича, муаммолар келишув имзоланаётган пайтдаёқ аниқланган. Битим расмийлаштирилган вақтда компаниянинг «Твиттер»даги расмий саҳифасида атиги 100 нафардан кўпроқ обуначиси бор эди. Умуман, Zero-Knowledge Proof оффшор-компаниялар макони сифатида ном қозонган Самоада рўйхатдан ўтган. Кейинчалик ушбу компания можаролар марказида юрадиган блогер Эндрю Тейт билан боғлиқлиги маълум бўлгач, «Барселона» юристлари дарҳол шартномадан чиқиш ҳаракатини бошлашди ва якунда мақсадга эришишди. Маълумот учун, одам савдоси ва зўрлаш айблови билан қамалган Эндрю Тейт 2022 йилнинг декабридан буён Руминия қамоқхонасида сақланмоқда.

Х.ЮСУПОВ тайёрлади