Футбол тарихида муайян клубга узвий боғланган футболчилар ҳам етарли. «Фиорентина»да порлаган Борха Валеро шундай садоқатпарварлар гуруҳига киради. Флоренция клуби тарихида алоҳида ўрин тутадиган испаниялик собиқ ярим ҳимоячи клубнинг 100 йиллик юбилейига бағишланган Violet Centenary («Бинафша 100 йиллик») подкастининг илк сонига таклиф этилгани бежиз эмас.

– Айтингчи, 100 йиллик тарихга эга «Фиорентина»нинг бир қисми эканлигингизни биласизми?

– Албатта. «Фиорентина» – кўп йиллар давомида Италия футболида катта аҳамият касб этган жамоа. Дейлик, турли йиллар таркибида Батистута, Баджо, Руи Кошта, Антоньони каби фантастик футболчилар тўп суришган. Болалигимдан Италия футболини кўп кузатардим ва «Фиорентина» ҳақида гап кетганида, аввало, кўз олдимга шу юлдузлар келишарди. Хуллас, мен учун ушбу улкан соҳилда бир зарра қум бўлиш – катта фахр.

– Флоренция ва «Фиорентина»га дахлдор биринчи таассуротларингизни эсласак…

– Ҳаммаси ғайриоддий ҳолда бошланган. Тўғриси, бошида жамоа чорловига беписанд қараганман, чунки олдимда бошқа вариантлар кўп эди. Боз устига, Google тизимида «Фиорентина»нинг сўнг­ги йиллардаги натижалари билан танишдим ва аксарият мавсумлар лигада «жон» сақлаш учун курашганига амин бўлдим. Шунинг учунми, бироз чўчидим, аммо охир-оқибат,  клуб вакиллари қизиқарли лойиҳа йўлга қўйилаётганига ишонтиришди.

– Мухлислар сизни ғайриоддий лақаб билан сийлашган – «мэр». Бунинг асл сабаби нима?

– Қайсидир маънода ғалати, ғайриоддий ва шунинг баробарида ёқимли лақаб. Эсимда, мухлислар суратим остига «мэр» ёзуви туширилган баннерни илк марта «Сассуоло»га қарши сафар ўйинида кўтаришганди. Шу-шу Италияда «мэр» бўлиб қолдим. Эътиборли томони, Флоренциянинг ўша пайтдаги ҳақиқий мэри билан учрашганимда, у шу маънода илиқ ҳазиллашганди, шаҳарнинг кейинги раҳбари ҳам.

– Айтингчи, мухлислар қалбидан чуқур жой эгаллашингизда, майдондаги ҳаракатларингиздан ташқари, яна қандай омиллар ёрдам берди?

– Аслида асосийси – майдондаги ўйин. Агар мухлислар кўз ўнгида чиройли футбол намойиш этолмасангиз, минг уринманг, улар билан илиқ муносабат ўрнатолмайсиз. Қисқаси, ҳамиша барчасини майдонда исботлаш, мухлислар қаршисида клуб учун боримни беришга уринганман. Шунингдек, сайрга чиқсам, одамлар билан мулоқотдан қочмасдим. 

– Ўз сўзларингиздан иқтибос: «Бегона маданият, хусусан, Флоренцияникини қабул қилиш қайсидир маънода бу ерда туғилишдан ҳам қимматлироқ». Бунинг маъноси…

– Инсон ўзи туғилиб-улғайган жойни эъзозлаши ва яхши кўриши табиий ҳол. Шу маънода Испания фуқароси эканлигимдан фахрланаман. Флоренцияда эса нафақат футболчи, балки шахс сифатида ҳам шаклландим. Очиғи, фарзандларимни шу шаҳарда улғайтираётганимдан хурсандман. Мана, кичик қизим ўзини чин флоренцияликдек тутади. Тўғри, унда Испания паспорти ҳам бор, лекин ўзини италиялик, деб билади.

– «Фиорентина» ҳақида гап очилса, яна нималарни ҳис қиласиз?

– «Фиорентина» – мен учун оддий клуб эмас, балки алоҳида саргузашт ва тажриба макони. Мадридда туғилганим боис, «Реал»га мухлислик қилсамда, «Фиорентина»га меҳрим бошқача. Айниқса, клубнинг сўнгги йиллардаги ривожланиш йўлида бевосита иштирок этганимдан хурсандман. Ишонтириб айтаман, агар кун келиб, жамоа тизимидан кетсам, четдан унинг муваффақиятларини кузатиш ҳам беқиёс завқ бағишлайди.

– «Реал» академияси тарбияланувчиси сифатида айтингчи, ўша вақт бошқа жамоаларда ўйнашингиз мумкинлигини тасаввур қилганмисиз ёки фақат «Мадрид»да тўп суришни ўйлагансиз?

– «Реал»да камол топган, энг буюк футболчилар ўйинларини кузатиб улғайган ҳар қандай ёш йигит фақат «Мадрид»да қолиш ва жамоанинг муҳим «фигура»си бўлишни орзу қилади. Лекин маълум вақтда ўзимга савол бергандим: «Хўш, «Реал»да нима қила оламан? Бу ерда ўсиш ва ривожланишим учун имконият бериладими?» Жавоб эса оддий: кутиш ва муваффақият йўлида жуда машаққатли йўлни босиб ўтиш керак. Якунда фаолиятимни бошқа жамоада давом эттиришга қарор қилганимдан сира афсусланмайман. Очиғи, «Қироллик клуби»да ўйнаб кетиш орзусига эришиш жуда қийин. Зеро, бунинг учун нафақат тинимсиз меҳнат, балки озгина омад ҳам талаб этилади. Менга эса иккинчиси етишмади. Асосийси, ҳозир ўзимни нимадандир маҳрум этилгандек ҳис қилмайман.

– Фаолиятингиздаги энг оғир мағлубиятни айта оласизми?

– 2014 йилги Италия кубоги финалида кузатилган омадсизлик жуда оғир ботганди. Ҳа, рақиб «Наполи» ҳал қилувчи ўйин фаворити саналган, бироқ бизда ҳам ғалаба қозониш учун етарлича имконият юзага келганди. Ўша баҳс воқеликлари шу қадар салбий таъсир кўрсатдики, кейинчалик ҳам ўзимизни финалда ўйнагандек ҳис қилолмадик. Бу – ҳалигача кўнгилни эзадиган хотира…

– Энди ёқимли хотираларга қайтамиз: илгари ҳеч қачон айтмаган қандайдир ҳикоянгиз борми?

– Албатта, «Фиорентина»да кўплаб қизиқарли воқеликларни бошдан ўтказганман. Масалан, «Ювентус»га қарши ўйиндан бир неча кун олдин 8-10 нафар футболчи бирга, оилавий тарзда кечки овқатга бордик. Ресторан бош ошпази эса олдимизга дабдурустдан шарт қўйди: «Агар бўлажак ўйинда ғалаба қозонсангиз, уйингизга бориб, ўз ёнимдан кечки овқат тайёрлаб бераман». Албатта, кулиб, бу осон эмаслигини тушунтирдик. Қарангки, амалда «Юве»дан устун келдик. Уйга қайтганимда эса, Амброзинидан хабар келди: «Йигитлар, уйимда тўпланамиз, ҳалиги ошпаз барча масаллиқларни жўнатибди, ўзи 20 дақиқада шу ерда бўлади». Табиийки, унинг уйида йиғилдик ва ошпаз чиндан ҳам, турли-туман масаллиқлар ҳамда идиш-товоқлари билан келгани, кечки овқат тайёрлаётганини кўрдик. Бу Флоренцияда бошимдан кечирган минглаб воқеликлардан бири, холос.

БЛИЦ

САВОЛ-ЖАВОБЛАР

– Сиз билан бирга ўйнаган энг кучли футболчи?

– Жузеппе Росси. Агар жароҳатлар халақит бермаганида, у янада мукаммал ўйин кўрсатган бўларди. Шунингдек, бу рўйхатга Муҳаммад Салоҳни ҳам қўшишим мумкин. Яна Хоакин Санчес исталган катта клубда ўйнашга етадиган иқтидорга эга бўлганини айтишим керак.

– «Фио»нинг асосий базаси – «Виола Парк» ҳақида қандай фикрдасиз?

– Дунё миқёсида ўзига хос, энг юқори инфратузилмага эга объект. Бошқа гап ортиқча.

– Яқин йилларда «Фиорентина» қай даражада ривожланиши мумкин?

– Босқичма-босқич ривожланиш тарафдориман. Пойдеворни тўғри қўйиш ва асосни мустаҳкамлаш муҳим. Кучли академия ҳамда замонавий инфратузилма билан тараққиёт сари замин ҳозирлаш маъқулроқ.

Манба: sports.ru, Х.ЮСУПОВ тайёрлади