Жорий мавсум Испания чемпионатида иккинчи ўринда турувчи лига – Сегундада иштирок этаётган камтарин «Альмерия» клуби «Инстаграм» тармоғидаги эътибор нуқтаи назаридан мамлакатнинг энг машҳур 5та клуби қаторига «сакради». Бинобарин, жамоанинг ушбу тармоқдаги обуначилари сони бирданига 3 миллион кишидан ошди. Барчаси Криштиану Роналдунинг эффекти, албатта.

Ҳа, Иккинчи дивизион жамоасининг бундай тезликда омма эътиборига тушгани «Ал-Наср» голеадори Криштиану Роналду билан боғлиқ. Гап шундаки, португалиялик беназир футболчи яқиндагина «Альмерия» акцияларидан 25 фоизини сотиб олиб, клуб соҳибларидан бирига айланди. Келишув ҳақида расмий хабар чиққанидан сўнг нафақат Испания, балки бутун Европада «Альмерия»га қизиқиш кескин ортди. Натижада жамоанинг «Инстаграм» тармоғидаги саҳифасига ёзилганлар сони 3,1 миллион кишига етди. Олдинда 3,7 миллион обуначига эга «Севилья» бор.

«Истаграм»да энг кўп обуначига эга Испания клуби – бу «Реал» (181 млн. обуначи). «Мадрид»нинг энг яқин таъқибчиси «Барселона»да эса обуначилар сони 146 миллион кишини ташкил этмоқда. 3-поғонада бораётган «Атлетико»нинг натижаси ҳам чакки эмас – 18 «лимон» кузатувчи. Лекин икки гранд бу борада ҳам шунчаки, космос.

Криштиану Роналду айни пайт жароҳат туфайли «Ал-Наср» ўйинларидан четда қолмоқда. 41 ёшли голеадор «Ал-Фейха»га қарши учрашувнинг якуний қисмида сафдан чиққанди. Tribal Football нашри хабарида айтилишича, португалиялик ҳужумчи сон соҳасидаги жароҳат туфайли 2-4 ҳафта даволаниши керак. Хабарларга қараганда, Роналду шу туфайли Португалия миллий жамоасининг март ойидаги йиғинида ҳам қатнашолмайди.