2 июль куни Швейцарияда аёллар ўртасида навбатдаги Европа чемпионати бошланди. 16та жамоани ўз ичига олган «кўҳна қитъа» турнири ёрқин ижрочиларга эга, албатта. The Guardian нашри Евро-2025га қизиқишни ошириш мақсадида баъзи футболчиларни қизиқарли фактлар ёрдамида алоҳида таништирди.
1. Анна Тамминен (Финляндия). Швецияда юк машинаси ҳайдовчиси бўлиб ишлаган Анна бошида футболчи бўлишни ўйламаган ҳатто. Асл йўналиши бўйича - физиотерапевт. Айнан Швецияда ўзини дарвозабон сифатида синаб кўрган Тамминен 757 дақиқага чўзилган «қуруқ» серия қайд этганидан сўнг бор эътиборини футболга қаратди.
2. Каролина Вильялмсдоттир (Исландия). Исландия футболи юлдузи Гильфи Сигурдссоннинг жияни. Каролина 2019 йили терма жамоа йиғини туфайли унинг тўйида қатнашолмаган.
3. Сельма Паненгстуен (Норвегия). Футболдан ташқари, қўшиқчилик билан шуғулланади. Овози ҳам, ижроси ҳам чакки эмас. Ҳар ҳолда, Сельмани вақти-вақти билан катта концерт-тадбирларга таклиф этишади.
4. Алиша Леманн (Швейцария). Эҳтимол, дунёдаги энг таниқли аёл футболчи. Онаси яқинда Алишага қаратилган танқидларга кескин жавоб берди: «Ҳа, қизим бўянади. У кўп йиллардан буён юқори даражада ўйнамоқда ва бу фақат косметикадан фойдалангани учун эмас, албатта».
5. Лаура Жулиани (Италия). DVD ишлаб чиқарувчи заводда, ресторанда ва қандолат цехининг тунги сменасида ишлаган. «Ювентус» ва «Милан» аёллар жамоаларида ўйнаган.
6. Жоана Маршуа (Португалия). Ўйинлар олдидан кийиниш хонасида тез-тез китоб ўқийди, айниқса, фантастика жанрига қизиқади. Китобга муҳаббати кутубхонада ишлайдиган отасидан ўтган. Жоана яна Моцарт мусиқасини қадрлайди.
7. Алексис Путельяс (Испания). Барча ғалабаларини 2та «Олтин тўп» ютганини кўрмай вафот этган отасига бағишлайди. Оғир жароҳат туфайли олдинги Европа чемпионатини ўтказиб юборган Алексис ЖЧгача тузалиб, ғалаба нашидасини сурди.
8. Леи Шуллер (Германия). Узоқ вақт тўшаги тепасида «Ҳеч қачон «Бавария»га ўтмайман» ёзувини осиб қўйган футболчи. Охир-оқибат, Леи 5 мавсумда 4 марта чемпион бўлди 96та гол урганча. Албатта, «Бавария»да.
9. Стина Йоханнес (Германия). Математика бўйича бакалавр даражасини олди, дифференциал геометрия мавзусида диссертация ишини ҳимоя қилди. Стина аналитик фикрлашни спортда ҳам қўллайди.
10. Ребекка Бломквист (Швеция). 22 ёшида саратон хасталигига чалинган ва узоқ даволанган. Ребекка ҳозир 27 ёшда ва «Вольфсбург» билан Германия чемпиони бўлишга улгурди.
11. Эва Пайор (Польша). Роберт Левандовски аналоги. Эва ҳам «Барселона»да ўйнайди ва кўп гол уради. Жамоадаги биринчи мавсумида 43та гол! Тўғри, у ҳозирча ЧЛни забт этолмаяпти: 5та финалда 5та муваффақиятсизлик.
12. Ханна Хэмптон (Англия). Кўзида нуқсони билан туғилган ва болалигида 3 марта операция столига ётган. Академияда Ханнага юқори савияда ўйнашни хаёлидан чиқариб ташлаши кераклигини айтишади. Аммо дарвозабонликни танлаган қиз қулоқ солмайди. Натижаси - «Челси» билан Англияда 2 марта чемпионлик, шунингдек, терма жамоа сафида ЖЧ финали.
13. Кайли Бартон (Уэльс). 16 ёшида футболни ташлаб, турли ишлар билан шуғулланган. Дейлик, супермаркет кассасида. Кайли 24 ёшида футболга қайтди ва муваффақиятга эришди. Айтишича, ундан спортга иккинчи имконият беришни отаси талаб қилган.
14. Шерида Спице (Нидерландия). Миллий жамоадаги ўйинлар сони бўйича Европа рекордчиси. Нидерландия термаси либосида 241та ўйин! Бу ҳали ҳаммаси эмас, чоғи. Шерида ҳозир 35 ёшда.
Манба: sports.ru, Д.АЛИМОВ тайёрлади
