Сўнгги йиллар «А» Сериядаги ишлари юришмаётгани сабабидан «Милан» раҳбарияти клуб бошқарув тизимида кичик ўзгаришга қўлди урди. Унга кўра, ўз вақтида «Лацио» ва Албания терма жамоасида тўп сурган тажрибали мутахассис Игли Таре «россонери»нинг янги спорт директори этиб тайинланди. Бунгача «Рома»да ҳам мазкур лавозимда ишлаб келаётган 51 ёшли Таре миланликлар билан шартнома имзолагач, маҳаллий журналистларни қизиқтирган саволларга жавоб қайтарди.
- Янги иш жойингизда ўзингизни қандай ҳис қиляпсиз ва ёзги трансфер ойнаси якунига қадар жамоа қандай хусусиятларга эга ўйинчилар билан шартнома имзолайди?
- Икки ҳафтадан бери «Милан»даман ҳамда ўзимни бу жамоанинг ажралмас қисмидек ҳис қилишимга замин яратиб берган барчадан миннатдорман. Бундай илиқ муносабатдан сўнг, клуб манфаатлари учун бор кучимни беришга ва жамоани ўз жойига - Италия ҳамда Европа футболининг энг юқори поғонасига қайтаришда ёрдам беришга аҳд қилдим. Саволингизнинг иккинчи қисмига келсак, трансфер ойнасининг биринчи босқичида қайси футболчилар билан хайрлашиш ва уларнинг ўрнига қандай даражадаги футболчилар олиб келишимиз мумкинлигини аниқлаб олдик. Ҳа, бу инқилоб эмас, лекин кейинги мавсумда жамоани рақобатбардош ҳолда шакллантиришнинг муҳим усули ҳисобланади. Зеро, узоқ муддатли лойиҳанинг пойдеворини мустаҳкам қўйиш эътибор талаб қиладиган масала.
- Сўнгги йилларда жамоа мавқеининг тушиб кетишига сабаб бўлаётган камчиликларни аниқлаб олдингизми?
- Эҳтимол ортда қолган давр бўйича клуб бошдан кечирган барча тафсилотлардан бевосита хабардор бўлмаслигим мумкин. Лекин ўйлашимча, жамоадаги энг катта муаммо таркибда етакчилик салоҳиятига эга футболчиларнинг етишмаслигида деб биламан. Шундай экан, Модрични қўлга киритиш айнан мана шу камчиликни ҳал қилади. Зеро, у жаҳон футболидаги жуда нуфузли шахс. Мен Лука билан музокара жараёнида бир неча бор шахсан гаплашдим ва унинг ҳали ҳам рақобатлашиш кайфиятида эканига ишонч ҳосил қилдим. Қолаверса, Модрич бу йил кўзда тутилган трансферларимизнинг ягона вакили бўлмайди. Ҳали яна бир-иккита тажрибали, ёш иқтидорларимизга етакчилик қобилиятини сингдира оладиган футболчилар билан шартнома имзолашни мақсад қилганмиз.
- Тео Эрнандес билан вазият қандай?
- Теонинг қай даражадаги ўйинчи эканлигини ҳамма яхши билади. У «Милан»нинг муваффақиятлари учун қўлидан келганини қилди. Аммо энди вазият ўзгармоқда. Биз мураббийлар штаби билан келишган ҳолда бошқа типдаги футболчилардан ташкил топган жамоа тузишга ҳаракат қиляпмиз.
- Бош директор Жоржо Фурлани яқин орада клубда ҳеч қандай инқилоб рўй бермаслигини айтиб ўтди. Лекин Меньян каби муҳим футболчиларнинг жамоадан кетиши мумкинлиги тез-тез қулоққа чалинмоқда...
- Меняьн ҳеч қаерга кетмаяпти - у кейинги мавсум ҳам «Милан»да қолади. Тўғри дарвозабонимизга АПЛ клубидан қизиқиш келиб тушди, аммо манфаатли келишувга эришишнинг имкони бўлмади. Умуман олганда трансфер бозорида нималар рўй бериши мумкинлигини олдиндан тахмин қилиш қийин. Ҳозирча, Майк биз билан бирга ва у жамоамизнинг ҳақиқий етакчиси.
- Рафаэл Леунинг клубдаги келажаги ҳақида қандай фикрдасиз? Ёки у ҳар қандай трансферлардан дахлсиз футболчими?
- Менимча, Лео ҳақиқий чемпион. Бугунги кунда у каби ўйинни ўз қўлига ола биладиган салоҳиятли футболчиларни топиш жуда қийин. Бир сўз билан айтганда Рафа лойиҳамиз учун керакли ижрочи ва мен уни жамоамизнинг ҳақиқий етакчиси сифатида кўрмоқдаман. Таклифлар? Биз ҳали Лео бўйича ҳеч бир клубдан расмий мурожаат олганимиз йўқ. Буларнинг ҳаммаси шунчаки миш-мишлар.
- Массимилиано Аллегрини «Милан»га олиб келиш қийин кечмадими?
- Йўқ асло. Аллегри билан биринчи мулоқотданоқ унинг бу клубга қанчалик қайғуришини ҳис қилдим. Биз бу каби жамоа муаммоларини чуқур англайдиган мутахассисларни қадрига етишимиз керак. Макс билан кечган учрашувимиз давомида бўлажак режалар ҳақида узоқ вақт суҳбатлашдик ва у тезда қарор қабул қилган ҳолда лойиҳамизда иштирок этишга розилик билдирди. Режага кўра, «Милан» янги мавсумнинг биринчи туриданоқ Скудетто учун асосий давогар бўлиши керак!
- Франческо Камарда бўйича режалар қандай?
- Раҳбарият ва мураббийлар штаби билан ёш футболчилар жумладан, ушбу клубнинг келажагида муҳим рол ўйнайдиган Камарда ҳақида ҳам узоқ суҳбатлашдик. Муҳокама якунида эса биз уни етарли ўйин амалиётига эга бўлиши ва янада ривожланиб ортга қайтишига умид билдирган ҳолда, «Лечче»га бир йилга ижарага беришга қарор қилдик.
- Кристиан Пулишич-чи, у жамоада қоладими?
- Ҳа, албатта Пулишич бўйича алоҳида режаларимиз бор ва умид қиламанки, у кейинги мавсумда «Милан»нинг асосий ўйинчиларидан бири бўлади. Вақти келганида эса ўзаро келишув муддатини узайтириш ҳақида ҳам музокараларга киришамиз. Ҳозир эса, бор диққат эътиборни таркибни кучайтириш жараёнига қаратганмиз.
- Тижани Рейндерснинг ўрнини қандай даражадаги ижрочи билан тўлдирмоқчисиз?
- Эҳтимол, Тижани билан таққослаш қийиндир, аммо «Милан»да Лофтус-Чикдек умидли ўйинчи бор. Ишончим комилки у тез орада Европадаги энг мукаммал ярим ҳимоячилардан бирига айланади. Шунингдек, биз Рейндерсдан фарқли хислатларга эга янги ўйинчиларни жалб қилиш ҳақида ҳам ўйлаяпмиз. Чунки янги мавсумдан бошлаб майдон марказида кўп қиррали уч нафар ярим ҳимоячи билан ўйнашни режалаштиряпмиз.
- Лука Модрич билан кечган суҳбат жараёнида нималар муҳокама қилинди?
- Лукани ўйлантирган ягона нарса «Милан»нинг келгусида қандай мақсадлар учун курашишини аниқлашдан иборат эди. У мендан «жамоа келаси йил «А» Серия ғолиблиги учун курашадими» - деб, сўради. Бундан келиб чиқадики, Модрич Италияга келиб лига қаҳрамонларидан бири бўлишни хоҳлайди. Бизга эса худди шундай менталитет, шахсият ва етакчилик нуқтаи назаридан таркибда муҳим рол ўйнайдиган футболчилар керак эди. Натижада музокаралар жараёнида ўзаро тил топишиш қийин кечмади ҳамда барчаси тезда ҳал бўлди. Насиб қилса, Лука Клублар ўртасидаги жаҳон чемпионатидан сўнг сафимизга келиб қўшилади.
Манба: acmilanfan.ru, Хуршид ЮСУПОВ тайёрлади
