Аввалги мавсум якунида «Барселона» билан хайрлашган тажрибали ҳимоячи Иньиго Мартинес август ойига келиб, Саудия Арабистонининг «Ал-Наср» клуби чорловини қабул қилди. Фахрий футболчининг ушбу юриши кўпчилик учун кутилмаган ҳол эди, бироқ унинг ўзи Жерар Ромеро муаллифлигидаги Jijantes лойиҳасига берган интервьюсида ҳозирги ёшида бундай таклифни рад этиш имконсиз эканлигини тушунтирди.
«Барселона»дан кетиш қарори
- Ханси Флик билан бу ҳақда батафсил гаплашдик ва вазиятни атрофлича муҳокама қилдик. Якунда мураббий кетиш қароримдан ҳайратда қолди, барибир. Фликка олдимда қизиқарли таклиф борлигини айтиб, уни кўндирдим. Ҳа, осон бўлгани йўқ, лекин тезкор қарор қабул қилишим керак эди. Ўз навбатида, кетишимга тўсқинлик қилмагани учун клуб раҳбариятидан миннатдорман. Зеро, ҳозир ҳамма ҳам бундай йўл тутмаяпти. Албатта, «Барселона»да ўзимни жамоанинг муҳим бир бўлагидек ҳис қилардим, ҳар куни машғулотлар майдонига тушишнинг ўзи бошқача завқ бағишларди. Бироқ ёшимни ҳисобга олдим, қолаверса, фаолиятимнинг финиш чизиғи кўринаётганини тушунган ҳолда, Саудияга юзланишни энг тўғри йўл сифатида баҳоладим. Ҳа, ўтган мавсум фаолиятимдаги энг яхшиларидан бирига айланди, аммо Каталонияда яна бир йил қолиб, етарли ўйин амалиёти олиш жуда қийинлигини теран тушундим.
«Барселона»даги ёш
иқтидорларга ишонч
- Ханси Флик қўл остида рақобатбардош жамоа бор, таркибда ёшлик ғайрати жўш ураётган, ўйинга чанқоқлиги юқори йигитлар жамланишган. Очиғини айтаман, мен ҳозирги иқтидорлар ёшида бу даражада катта масъулиятни ҳис қилган эмасман. Ўша вақт шунчаки, майдонга тушардим ва бехато ўйнашга уринардим. Ҳозирги ёшлар эса жаҳон миқёсида энг зўр эканликларини исботлашга уринишмоқда, маррани катта олишмоқда.
Фермин Лопес ва Ламин Ямал феномени
- Фермин - кийиниш хонасида ўзига хос мотиватор ва жамоа таркибидаги муҳим ижрочилардан бири. У ҳар сафар майдонга тушганида, аввало, ўзи учун қандайдир янгилик кашф қилишга интилади. Шунингдек камтар, доимо жилмайиб юрадиган самимий йигит. Ферминнинг «Барса»да ўз ўрнини топишига ҳеч қачон шубҳаланган эмасман. Жамоадан кетаётганимда эса, унга озгина маслаҳат бердим: «Нима қилишингдан қатъий назар, худди шу кайфиятда давом эт, шунда етук футболчига айланасан». Ямал ҳақида гапирсам, очиғи, шу пайтга қадар қатор ажойиб истеъдодлар билан ўйнаганман, лекин Ламиннинг даражаси бошқа - ақлга сиғмас иқтидор. Ямални тўхтатиб қолишнинг ягона йўли - бу уни майдондан олиб ташлаш бўлса керак...
ЧЛ ярим финали, «Интер»га қарши омадсиз ўйин...
- Ўша учрашувдаги мағлубият барчамиз учун жуда кучли зарба бўлди. Тўғриси, анчагача ўзимизга келолмадик. Ўйлашимча, ўтган мавсумдаги ўйинларимиз билан финалга ҳақли эдик, бироқ... Умидворманки, «Барселона» бу мавсум ҳам яна шундай имкониятга эга бўлади ва ундан тўғри фойдаланади. Финални стадиондан кузатаманми? Албатта, агар «Барса» чиқса, трибунадан жой олишим аниқ.
Манба: barcamania.com, М.ПЎЛАТОВ тайёрлади
