Бугун ОЧЛ-2 тўртинчи баҳслари доирасида ўтказиладиган “Ал-Халдия” - “Андижон” жамоалари ўртасидаги беллашув “Ал-Муҳаррақ” стадионида бўлиб ўтади. Кеча одатдагидек, ўйин олдидан икки жамоа мураббийлари иштирокида матбуот анжумани ташкил этилди. Унда дастлаб андижонликлар устози Максим Шацких ва футболчи Усмонали Исмоналиев иштирок этиб, ўз фикрларини билдириб ўтдилар.
- Бу ўйинга қандай тайёргарлик кўрилди?
Максим Шацких: - Ҳаммага хайрли кеч. Бу учрашувга ҳар доимгидек - чемпионат ва ОЧЛ баҳсларидаги тайёргарлик каби ҳозирлик кўрдик. Мен ишонаманки, ҳамма турнир жадвалидаги ҳолатни билади. Ушбу учрашув муҳимлигини ҳам билиб турибмиз. Биз жиддий тайёргарлик кўрдик ва тайёрмиз. Қанақа натижа бўлишини эртага ўйиндан кейин кўрамиз.
Усмонали Исмоналиев: - Бу рақиб билан ўйнаганимизга ҳали кўп бўлмади. Биринчи учрашувда иккала жамоа бир-бирини яхши ўрганди, деб ўйлайман. Худо хоҳласа, ўзимизга яраша тайёргарлик кўриб келдик. Бекордан-бекорга келганимиз йўқ. Бу оддий учрашув эмас. Насиб бўлса, уч очко билан қайтишга ҳаракат қиламиз. Мураббийларни кўрсатмаларини тўлиқ бажарсак, уйга ғалаба билан қайтамиз.
