Табиийки, Ўзбекистон бу минтақада энг кўп легионерларга эга. Чунки мамлакатнинг юздан ортиқ футболчиси хорижда тўп суради. Фақатгина, Қирғизистон ва Тожикистон чемпионатларининг ўзида ўзбек легионерларининг сони 50дан ошиши фикримизнинг яққол исботи. Бироқ айни пайтда чет эл жамоаларидан кўпи билан 12 нафар футболчи терма жамоага чақирилади. Қолаверса, улардан камида иккитаси катта эҳтимол билан шу ёзда ортга қайтишади - Турғунбоев ва Абдихолиқов. Лекин уларнинг ўрнини тўлдириши кутилаётган МТЖ аъзолари бор албатта.
Қирғизистон терма жамоасида эса айни дамда 9 нафар легионер футболчи тўп суради. Аммо бир ҳафта олдин Кимми Мерк “Дордой” билан шартнома имзолади. Шунингдек, Шамурзаев ҳам Қирғизистонга қайтиши кутилмоқда.
Гарчи Қозоғистон ОФКга аъзо давлатлар рўйхатида бўлмасада, бу мамлакат футболи барибир марказий Осиё давлатлари футболи билан солиштирилади. Демак кўриб чиқамиз. Айни дамда миллий терма жамоада хориждан атиги беш нафар футболчи бор – Аимбетов, Алип, Зайнутдинов, Самородов ва Покатилов. Жуков, Оразов, Кенжебек, Сквортсов ва Шушеначев яқинда ватанларига қайтишди.
Туркманистон терма жамоасининг сўнгги ўйинида бор-йўғи икки нафар хорижлик футболчи - ўзганлик Титов ва "Торпедо-БелАЗ" футболчиси Чориев тўп сурди. Лекин, албатта, Жумаев ва Мингазовни ҳам эсдан чиқариб бўлмайди.
