Ортда қолган мавсум кутилган натижаларни қайд этолмаган «Милан» бошқарув тизимида яна катта ўзгаришлар кузатилди. Хусусан, клубнинг янги раҳбарияти португалиялик мураббий Сержиу Консейсауни истеъфога чиқариб, ўрнига Италия футболида чинакамига донг таратган Массимилиано Аллегрини таклиф этди. Хўш, «россонерлар»га бегона бўлмаган мутахассис янги кампаниядан нималар кутмоқда? Яқинда журналистлар иштирокидаги махсус матбуот анжуманида қатнашган мураббий шу масалага ҳам тўхталди.
«Милан» таклифини қабул қилиши
- Олдингизда яна «Милан» бош мураббийи сифатида кўриниш бераётганимдан хурсандман. Мана, янги футбол саёҳати арафасида турибмиз. Умидворманки, жамоа билан яна бир бор қизиқарли ва завқли саргузаштни бошдан ўтказамиз. Ўйлайманки, ўзим учун муносиб жойдаман, энди жипслашиб, буюк ғалабалар сари интиламиз, албатта.
Клубга қайтиш таассуротлари
- Миланеллога ҳар доим ўз уйимдек қараганман. Айниқса, бу ердаги бирдамликни ниҳоятда қадрлайман. Клубга қайтишим ҳамоно Игли Таре бошчилигидаги янги раҳбарият ва ходимлар билан фақат бир йўналиш бўйича ҳаракатланишга келишиб олдик. Бундан ташқари, янги ишчилар ва нотаниш кишилар билан танишиб чиқдим. Муҳими, коллективнинг жонкуярлиги ва янги марраларни забт этиш иштиёқи мени янада илҳомлантирди.
Янги мавсум марралари
- Энг устувор вазифамиз - ЧЛга қайтиш. Бунда мавсумнинг старт қисми жуда муҳим. Дейлик, дастлабки 6 ойда муваффақиятли ўйнаб, тўғри йўналишга тушиб олишимиз керак. Чунончи, одатда чемпионатнинг баҳорги қисмигача кўп нарсалар ойдинлашиб қолади. Айниқса, март ойидаги ўйинларга жиддий ёндашиш талаб этилади.
Ўтган мавсум хулосалари
- Ҳа, ортда қолган мавсум «Милан» учун кўнгилдагидек кечмади, шунга қарамай, бирдан умумий хулоса чиқариш қийин. Зеро, жамоа бир қатор ўйинларда муҳим ғалабаларни қўлга киритди. Хусусан, суперкубокда зафар қозонди, Италия кубогида эса финалга чиқди. Умуман олганда, «россонерлар»нинг ўтган мавсумдаги ўйинлари шахсан менда ёмон таассурот қолдиргани йўқ. Лекин буларнинг барчаси энди тарих. Олдинда эса бизни янги рақобат ва тарих кутмоқда.
Клуб рамзига яна бир юлдузча қўшиш...
- Нафақат футбол, балки бошқа соҳаларда ҳам барчаси кичик қадамлардан бошланади. Такрорлайман, биринчи галдаги вазифамиз - ЧЛга қайтиш. Бунинг учун доимий равишда очко тўплаш керак, албатта. Агарда келаси йилнинг март ойи охирларида турнир жадвалининг юқорисида турсак, унда табиий равишда скудетто ва янги юлдузча олишга умид боғлаймиз.
Тактик ишланмаларга ёндашув
- Ҳар доим таъкидлаб келганман: агар тўп бизда бўлса, гол уришимиз шарт. Бордию, тўп рақибга ўтса, унда дарвозамиз дахлсизлигини таъминлашимиз лозим. Футболнинг асосий қоидаси шу. Тактик ишланмалар бўйича қандай ўзгаришларга қўл уришимизни эса мавсум давомида билиб оласизлар.
Майк Меньян ва бошқалар
- Майк - жамоамиз сардори ва етакчиси. Унинг клубда қолганидан хурсандман. Леау билан ҳам вазият худди шундай. Қувонарлиси, Рафа ўсишга мойил ва ишончим комилки, янги мавсум унга аталади.
Модрич феномени
- Лука август ойи бошида сафимизга қўшилади. Шу билан Лофтус-Чик, Фофана, Бондо, Муса ва Модричдек ижрочилардан иборат мужассам ярим ҳимоя чизиғига эга бўламиз. Ихтиёримдаги йигитларнинг хусусиятларидан келиб чиқиб, янги мавсумда 3 нафар марказий ярим ҳимоячи билан ўйнашни режалаштиряпман.
Ёпиқ ўйин услуби ва танқид
- Очиғи, бу мавзуда гапираверишдан чарчадим. Ахир футбол турли қисм ва услублардан иборат-ку. Мисол учун, Роналдунинг «Ювентус» дарвозасига урган фантастик голини ҳалигача эслашади. Унгача кузатилган 20тача узатма эса ҳеч кимнинг хаёлида ҳам йўқ. Футбол шундай - натижадан бошқаси унутилади. Яъни ниманинг эвазига муваффақият қозонилгани кўпчиликни қизиқтирмайди. Танқидчилар гўзалликни футболчилар ҳаракатидан қидиришади. Мураббийларнинг бу борадаги қарашлари эса мутлақо бошқача...
Манба: acmilannews, Хуршидбек тайёрлади
