Навоийнинг «Қизилқум» клуби жамоа ҳимоячиси Дилшод Комилов билан хайрлашганини эълон қилди. «Жорий мавсум бошидан бери «Қизилқум» таркибида ҳаракат қилиб келаётган ҳимоячи Дилшод Комилов билан шартнома клуб раҳбарияти қарори билан бир томонлама бекор қилинди.
Дилшод Комиловнинг Суперлига 21-тур доирасида «Қўқон-1912» жамоасига қарши кечган баҳсдаги профессионал футболчиларга хос бўлмаган ҳатти-ҳаракатлари мухлис-у мутахассислар ва кенг жамоатчилик эътирозига сабабчи бўлди» - дейилди клуб баёнотида.
Аввалроқ, Ўзбекистон миллий жамоаси билан CAFA-2025 турнири финалида асосий таркибда майдонга тушиб, мусобақа ғолибига айланган Дилшод Комилов финалдан 4 кун ўтиб, «Қизилқум» сафида Қўқондаги ўйинда майдонга тушиб, бош мураббий Рустам Акмаловнинг иккинчи бўлимда уни захирага олиш қарорига қарши чиқиб, майдонда қолган эди.
