ЖЧ-2026 финал босқичига талпинаётган «кичик» жамоалардан бири - бу Кюрасао термаси. КОНКАКАФ зонасидаги мундиал саралашининг учинчи босқичи 5-туридан сўнг «В» гуруҳида 11 очко билан пешқадамлик қилаётган ушбу жамоа таркибида Кюрасао оролининг ўзида туғилган бирор футболчи йўқ. Наҳотки, қанақасига шундай бўлиши мумкин?
Ишониш қийин, лекин бу факт. Ҳар ҳолда, Кюрасао миллий жамоасининг октябрь ойидаги охирги 2та ўйини (Ямайка ҳамда Тринидад ва Тобаго термаларига қарши) қайдномасига қарасак, рўйхатга тушган 24 нафар футболчининг ҳеч бири оролда туғилмаган. Қисқаси, жамоа бош мураббийи Дик Адвокаат охирги ўйинларда фақат ўз юрти - Нидерландияда таваллуд топган футболчиларга ишонч билдирди.
Нима, миллий жамоани тўлиқ бошқа мамлакатда туғилган футболчилардан шакллантириш ФИФА қоидаларига зид эмасми? Гап шундаки, Кюрасао тарихан Нидерландия мустамлакаси саналган ва ҳозирги кунда ҳам шу Қироллик таркибидаги мустақил мамлакат ҳисобланади. Шунинг учун, Нидерландияда туғилиб-улғайган хоҳлаган футболчи Кюрасао термаси шарафини ҳимоя қилиш ҳуқуқига эга. Машҳур Дик Адвокаат ҳам шуни ҳисобга олган ҳолда, Кюрасао терма жамоаси бошқарувини қўлга олгандир балки...
