Сардор Рашидовнинг фаолиятидан бир шингил. 90minutuz подкастининг навбатдаги сонларидан бирида меҳмон бўлган миллий жамоамиз собиқ ярим ҳимоячиси Сардор Рашидов футбол йўлида кузатилган баъзи воқеликларни очиқ-ойдин айтиб берди. Аниқроғи, Жиззах футболи фахри Дубайда тайёрланган кўрсатув давомида Португалия чемпионатига боргани ва у ердан қайтгани тарихини эсга олди.
Португалияга бориш
— Ҳар доим Европада ўйнашга қизиққанман, шунга интилганман. 2019 йилги Осиё кубогидан ўрин олган Уммон термасига қарши ўйиндан кейин эса Португалия клубидан таклиф тушди. Ўша вақт «Локомотив» билан шартномам муддати тугаган эди. Оддий таклиф: ойига 10 минг евро миқдорида маош. Шартномага меҳмонхонанинг ўзида имзо чекдим. Қарасам, 2,5 йиллик келишув. Бунга қадар муддатга эътибор ҳам қаратмагандим. Хуллас, кўп ўтмай, Мадейра ороли, Криштиану Роналду туғилган шаҳарга йўл олдим. Бироқ оиламдан йироқда кўп юролмайман. Дастлабки баҳсда кучли «Бенфика»га ютқаздик, кейингисида бирданига 3та гол урдим. «Насьонал» оддий жамоа эди, шароитларни арабларники билан таққослаб бўлмасди.
Португалиядан қайтиш
- Орада паспортим муддати тугади ва Ўзбекистонга қайтдим. Шу паллада «Қатар СК» таклиф билан чиқди. Ойига — 130 минг евро маош. Энди бир ўйланг: Португалияда 10 минг, Қатарда 130 минг. Кимдан сўрасангиз ҳам, бир хил жавоб эшитсангиз керак. Ахир ўртадаги фарқ — 120 минг евро! Кетмоқчи эканлигимни билган португалиялик агент эса масалани чалкашлаштирди. У «Арабларга қимматроққа сот...» қабилида клуб президенти қулоғини қиздирди. «Қатар СК» вакиллари эса трансферга пул тўлашни исташмади, акс ҳолда, маошни қисқаришларини айтишди. Шу тариқа ўзим клуб президенти олдига чиқдим, вазиятни очиқ-ойдин тушунтирдим. Боз устига, жамоа қуйи лигага тушиб кетган ва таркибда қолмоқчи эмасдим. Клуб раҳбарига дангалини айтдим: «Қанча сўрасангиз, бераман. Олган маошим — 50 минг еврони тўлиқ қайтараман». Бироқ кўнмади. Шунда «Қатар СК» билан алоқа ўрнатдим ва трансфер учун 100 минг евро сўраётганларини айтдим. Клуб раҳбари эса дарҳол рози бўлди ва ўз ҳисобидан тўлади. Маошимни ҳам қисқартирмади. Клуб президенти банк ҳисоб рақамини берди, пулни ўтказдим. Якунда шартномамни қайтариб олиб, хурсанд ҳолда, оилам билан Қатарга йўл олдим.
Шартномага имзо чекилган пайт ўша агент қўнғироқ қилди: «Ўзбекистонда бўлишингни айтгандинг, Қатарда нима қиляпсан?». Клуб президентини алдаганим ва у ўйнашимга рухсат бериладиган «тугмани босмаслиги»ни айтди. Вақт ўтаётганди. Кейин Қатар томони ФИФАга мурожаат қилди. Хусусан, Деку билан алоқага чиқишди ва у президент олдига кирди. Бироқ бефойда, барибир. Шунда Қатар шайхининг шахсан ўзи «Ал-Дуҳайл» билан ўйинда иштирок этишим учун қанча талаб этишаётганини сўради. Португалиядан жавоб келди: «Ҳеч қанча. Пул керак эмас, шунчаки, Рашидов мени алдади». Шундан сўнг «Қатар СК» ФИФАга расман шикоят киритди ва ташкилот ўйнаш лизенциямни тиклаб берди. Ҳатто шайх қўшимча 50 ёки 100 минг евро беришга рози турганди. Энди Португалиядаги муносабат ва Қатардаги ёндашув ўртасидаги фарқни ўзингиз солиштириб олаверинг...
