Суперлига 14-туридан ўрин олган "Насаф" - "Пахтакор" (2:2) учрашувидан сўнг мезбонлар бош мураббийи Рўзиқул Бердиев матбуот анжуманида иштирок этди.
“Ғалабага муносиб эдик, ўйин томонлама рақибдан кучли эканимизни кўрсатиб тургандик, аммо охирги дақиқаларда иккита тўп ўтказиб юбордик. Икки очко йўқотдик деб ўйлайман. Ҳисоб 2:0 пайтида "Пахтакор" ўйинни ташлаб юборганида балки ғалаба қозонган бўлармидик... Иккинчи бўлим ўрталарида Чоловичда олдинга ҳаракат камайди, шу боис уни алмаштирдик. Охирги ўн ёки етти дақиқа биз учун ғалати кечди. Ҳали ўйинни тўлиқ қайтадан кўриб таҳлил қилиб чиқамиз. Ҳимоячимиз Ғолиб Ғайбуллаевнинг айтишича, ўша вазиятда тўп рақиб ўйинчиси қўлига теккан экан, шу боис ҳакам билан гаплашди. Лекин камерада яхши кўринмаяпти, балки бошқа ракурсдан камера олганида кўринган бўлармиди. Баъзи жамоалар бор, ҳалол ўйин қоидасига амал қилади, лекин баъзи жамоалар бунга амал қилмас экан. Буниям қабул қилишимиз керак. Ўйиндан олдин "Пахтакор"га қарши 9та учрашувдан бери ютқазмаётганимиз ҳақида билгандим. Лекин статистика бу ўйин эмас. Кўп нарсани майдондаги кураш ҳал қилади. Ҳар бир ўйин ўтиб бўлгач, тарихга айланади.
