Янги мавсум олдидан таркибни кучайтириш ишларига алоҳида эътибор қаратаётган «Барселона» сўнгги йиллар «Эспаньол»даги ёрқин ўйинлари билан гранд жамоалар эътиборига тушган ёш ва салоҳиятли дарвозабон Жоан Гарсияни ўз сафига қўшиб олди. Гап Испаниянинг турли ёш тоифасидаги терма жамоаларида муваффақиятли ўйнаган кипер ҳақида кетмоқда. Табиийки, Каталониянинг биринчи рақамли жамоаси мухлислари Жоан Гарсия илк мавсумданоқ катта қаҳрамонликлар кўрсатишини кутишади. Кипер бундай юқори талабларга нечоғли тайёр?
- «Барселона»дан ташқари, яна кўплаб гранд жамоалар хизматингизга жиддий қизиққанди. Каталонияда қолиш қарорингизни қандай изоҳлайсиз?
- Ҳаммаси оддий. Ахир «Барселона» айни дам ҳам жаҳон футболидаги энг яхши лойиҳалар қаторига киради. Асосийси, жамоа таркиб ва яратилган тузилма юзасидан мавжуд барча совринлар учун курашиш салоҳиятига эга. Ўзи азалдан шундай лойиҳага қўшилишни хоҳлаганман. Қувонарли томони, орзумни амалга ошириш учун уйдан узоқлашганим ҳам йўқ.
- Демак бошқа таклифларга умуман эътибор қаратмадингиз, шундайми?
- Турли жамоалар томонидан қизиқиш мавсум якунланмасидан авж олганди. Ўша пайт чемпионат ўйинлари ўта шиддатли кечаётганди. Қисқаси, чалғимаслик учун мавсум охиригача майдон ташқарисидаги воқеаларга у қадар эътибор қаратмадим. Кейинчалик яқинларим билан маслаҳатлашган ҳолда, «Барса» вариантини танладим. Мен ташлашим керак бўлган кейинги қадам шу эди. Яъни вақти келганди.
- «Барселона»даги истиқболингизга қай даражада ишоняпсиз?
- Ҳозир жамоада жуда ёш таркиб шаклланмоқда ва ўйлайманки, шу жиҳат мослашиб кетишимда роса қўл келади. Қолаверса, таркибдаги кўплаб йигитлар билан яқиндан танишман. Эҳтимол, биринчи мавсумда маълум қийинчиликларга дуч келарман, аммо маҳоратли клубдошлар билан бирга шуғулланиш асносида тажриба орттириш ва жамоага киришиб кетишимга тўлиқ ишонаман.
- «Барселона» дарвозабонлари ўртасидаги рақобат юзасидан нима дейсиз?
- Болалигимда етук футболчи бўлишни орзу қилганман. Ҳозир ўша дамлар шундоқ кўз ўнгимдан ўтмоқда. Ўша вақтдаёқ мақсад қанча юқори қўйилса, бажариладиган иш ҳажми ва қийинчиликлар шунга яраша бўлишини тушунганман. Умуман олганда, кўп йиллар давомида ўз устимда тинимсиз ишладим ва қандай салоҳиятга эгалигимни яхши биламан. Шундай экан, мутлақо хотиржамман. Оддий айтганда, янги чақирувларга тайёрман. Қолаверса, кучли рақобат бўлгани ҳаммамизга яхши. Яна шуни ҳам алоҳида таъкидлашим керак, дарвозабонлар ўртасида бошқа позициялар вакилларида кузатилмайдиган ўзига хос ришталар мавжуд.
Манба: barcamania.com, Х.ЮСУПОВ тайёрлади
