A Bola нашри маълумотига кўра, Килиан Мбаппенинг онаси ва менежери Файза Ламари «Реал»­-дан асосий жамоа­нинг 8 нафар футболчисига қараганда кўп пул олмоқда. Диққат қилинг, «Мадрид» хонимга бир йил учун 4,5 миллион евро тўлайди. Қолаверса, бу солиқ тўловларидан холи сумма.

Хуллас, Файза Ламари йиллик улуш бўйича «Мадрид» асосий жамоасида ўйнаётган нақ 8 нафар футболчидан яхшироқ кўрсаткичга эга. Қайд этилишича, айни шартномага мувофиқ, жамоада Андрей Лунин, Фран Гарсия, Рауль Асенсио, Арда Гюлер, Франко Мастантуоно, Браим Диас, Гонсало Гарсия ва «Лион»да ижара муддатини ўтаётган Эндрик франциялик хонимдан кам маош олишади. Гап шундаки, келишувга кўра, «Реал» Килиан Мбаппе онасига футболчининг йиллик соф иш ҳақи 30 фоизи миқдорида бонус ажратиши керак. A Bola маълумотига кўра эса, Килиан йилига 15 «лимон» эвазига ўйнамоқда (солиқ тўловларидан кейинги сумма). Аслида Ламари хоним бошида ўғлининг шахсий менежери сифатида унинг маоши 50 фоизи миқдорида бонус олишни режалаштирган, фақат ҳужумчи аралашуви билан томонлар чамаси 30 фоиз меъёрида келишувга эришишган.

Transfermarkt портали Европанинг кучли 5та лигасида энг кўп маошга эга футболчилар рейтингини тақдим қилди. Унга кўра, Килиан Мбаппе йиллик 31,3 миллион евро билан 2-ўринда. Маош борасида франциялик ҳужумчидан «Манчестер Сити» голеалори Эрлинг Холандгина бироз олдинда – 31,6 «лимон».

Европанинг кучли 5та лигасида энг катта маошга эга футболчилар

1. Эрлинг Холанд («Манчестер Сити») – 31,6 млн. евро

2. Килиан Мбаппе («Реал») – 31,3 млн. евро

3. Гарри Кейн («Бавария») – 25 млн. евро

   Винисиус Жуниор («Реал») – 25 млн. евро

5. Муҳаммад Салоҳ («Ливерпуль») – 24,1 млн. евро

6. Давид Алаба («Реал») – 22,5 млн. евро

7. Душан Влахович («Ювентус») – 22,2 млн. евро

8. Каземиро («МЮ») – 21,1 млн. евро

   Виржиль ван Дейк («Ливерпуль») – 21,1 млн. евро

10. Мануэль Нойер («Бавария») – 21 млн. евро.