Тиниб-тинчимас Жеймс Милнер АПЛдаги ўйинлари сонини 654тага етказиб, ниҳоят, Гарет Бэррига тегишли рекордни янгилади. «Брайтон»нинг 40 ёшли толмас футболчиси «Брентфорд»га қарши ўйинда майдонга тушиш орқали АПЛ тарихига қалин муҳр босди. Гарет Бэрри ўйинлар сони бўйича АПЛ рекорди (653та)ни 2017 йили ўрнатган ва бу абадий сақланадигандек эди. Йўқ, Жеймс бунга кўнмади. Эътиборли томони, Милнерни биринчилардан бўлиб, айнан Гаретнинг ўзи қутлади.

Маълумот учун, Милнер ва Бэрри «Манчестер Сити» ҳамда «Астон Вилла»да бирга ўйнашган. Хуллас, Гарет The Sun нашрига берган интервьюсида ўз рекорди қулаганидан бироз хафа эканлигини билдирди, лекин шунинг баробарида собиқ клубдоши ва дўсти учун хурсандлигини алоҳида таъкидлади. «Реал жараёнда қандай натижага эришганинг ҳақида умуман ўйламайсан. Шунчаки, майдонга тушасан, ўйиндан ўйинга юқорига кўтарилаверасан. Ҳар ҳолда, бир жойга ўтириб олганча 600 ёки 650та ўйин маррасига етиш ҳақида ўйламайсан. Аксинча, реал вақтда яшайсан, ўз клубинг учун қўлдан келганича ёрдам беришга ҳаракат қилсам. Қисқаси, қандай юксак натижага эришганингни фаолиятинг тугамагунича тўлиқ англолмайсан. Мана, ҳозир сайрга чиққанимда, одамлар олдимга келиб, асосан шу рекорд ҳақида гапиришади. Улар мен учун хурсандлар. Шу маънода рекордим қулаганидан бироз хафаман, буни яширишга ҳожат йўқ. Ахир гап футболдаги энг катта ютуқларимдан бири ҳақида кетмоқда.

Шунинг баробарида Милли учун хурсандман. У билан 2та клубда бирга ўйнаганман ва бундай натижага эришиш учун қандай характер кераклигини яхши биламан. Қанчалик қи­йинлигини ҳам. Жеймс нақадар меҳнаткаш йигит эканлигини ўз кўзларим билан кўрганман. Рекорд тинимсиз меҳнат, мислсиз фидойилик ортидан келади. Айниқса, ўйинлар сони бўйича рекордда тасодифнинг улуши йўқ. Шундай экан, Миллини чин юракдан табриклайман. Бу марра Жеймсдан қанча меҳнат талаб қилганини мана, мендан сўрашингиз мумкин».