Londonning “Chelsi” klubi kutilmagan bayonot bilan chiqdi: bosh murabbiy Enzo Mareska o’z lavozimini tark etdi. Tomonlar o’zaro kelishuv asosida shartnomani bekor qilishga qaror qilishdi. Klub matbuot xizmati italiyalik mutaxassisga jamoa rivojiga qo’shgan hissasi uchun minnatdorlik bildirdi.

Mareska qo’l ostida “ko’klar” sezilarli yutuqlarga erishishdi. U jamoani Konferensiyalar Ligasi va Klublar o’rtasidagi Jahon Chempionatida g’oliblikka yetakladi. Ushbu kuboklar klubning yaqin tarihidagi muhim sahifalarga aylandi. Biroq, so’nggi natijalar va jamoaning ichki holati rahbariyatni keskin qaror chiqarishga majbur qilgan ko’rinadi.

Klub bayonotidan parcha:

“Enzo jamoani tarixiy g’alabalar sari yetakladi. Hozirgi vaziyatda, to’rtta musobaqada, jumladan, Chempionlar Ligasi yo’llanmasi uchun kurashayotgan bir paytda, o’zgarish qilish mavsumni iziga solish uchun eng yaxshi imkoniyat deb hisoblaymiz.”

Eslatib o’tamiz, ushbu xabar rasman chiqishidan avval taniqli insayder Fabrizio Romano Mareskaning ketishi aniqligini ma’lum qilgan edi. “Chelsi” endi tez fursatda yangi bosh murabbiy qidirish ishlarini boshlaydi, chunki mavsumning hal qiluvchi pallasi yaqinlashmoqda. Mareskaga esa kelgusi faoliyatida omad tilab qolingan.