«Милан»даги 5 йиллик ёрқин фаолияти давомида тиффозиларнинг чин ёқимтойига айланган Алешандро Пато вақтида жаҳон футболидаги элит ҳужумчилар қаторида эътироф этиларди. Бироқ бразилиялик иқтидор «россонерлар» билан хайрлашганидан кейин фаолиятини ҳамма кутган даражада ривожлантиролмади. Оддий айтганда, Патонинг футболдаги энг яхши даври айнан «Милан» билан боғлиқ. Шунинг учунми, жорий йил аввалида бутсаларини расман михга илган 35 ёшли ҳужумчининг «Милан»га нисбатан муҳаббати ҳамон заррача ўзгарган эмас. Буни Патонинг ўзи Gazzetta dello Sport ижодкорларига берган интервьюсида ҳам алоҳида таъкидлади.
- Алешандро, биографиянгиздан болалигингизда жуда оғир синовларни бошдан кечирганингиз маълум. Аммо кейинчалик ҳам шахсий ҳаётда жиддий муаммоларга дуч келганингизни кўпчилик яхши билмайди. Келинг, суҳбатимизни шу кунга қадар қандай қийинчиликларни енгиб ўтганингизни эслаш билан бошласак...
- Аввало, бошимга қандай синов ва мураккабликлар тушмасин, барчасини муносиб енгиб ўтишга қодир қилган Яратганга шукрона айтаман. Кўпинча ҳаётимизда рўй берадиган воқеликларни ўйлаб, ўзимизни ёки кимларнидир айблашга одатланганмиз. Аммо ҳақиқат шуки, барчаси Худонинг иродаси билан бўлади. Буни теран англаган ҳолда, ҳаётимнинг ҳар лаҳзасини хотиржамлик билан қабул қилиман. Эсимда, вақтида кучли тушкунлик домида қолганимда, кимлардир спиртли ичимликларга ружу қўйганимни ҳам айтишди. Аммо бундай гап-сўзларнинг ҳаммаси ғирт бемаънилик эди. Аксинча, барчаси ўткинчи эканлигига тўлиқ ишонганман, бу ҳамиша ўзимни назорат қилишимга ёрдам берган.
- 11 ёшингизда саратон хасталигига чалинган экансиз...
- Албатта, бу ҳам бир синов. Ўша вақт оиламда мени даволатиш учун пул тугул тиббий суғурта ҳам йўқ эди. Отам майдондаги ҳаракатларим тасвирланган видеолавҳани доктор Пауло Роберто Муссига кўрсатгач, у мени текинга даволаниши айтган. Муолажалардан кейин жиддий касаллик чекинган ва қисқа фурсатда оёққа тургандим. Хўш, бу Яратганнинг инояти эмасми? Шундай экан, нега нолишим керак?
- Ёшлигингизда сизни бир қатор гранд клублар ўз сафига қўшиб олиш учун ҳаракат қилганди. Қизиқ, нега айнан «Милан»ни танлагансиз?
- Дарҳақиқат, ўша пайт кўплар катта жамоалардан аниқ таклифлар тушганди. Танловга келсак, шунчаки, «Милан» либосини кийиш иштиёқи кучлилик қилган. Яъни аввало, қалбимга қулоқ солганман. Тўғри, «россонерлар» раҳбариятининг ўйинимни кўриш учун Бразилияга келгани ва клуб бош мураббийи Карло Анчелотти U-20 тоифасидаги жаҳон чемпионатида ҳаракатларимни бевосита Канададаги стадионларда кузатгани ҳам муҳим аҳамият касб этган, албатта. Шу жойда ошкора айтишим керак, фаолиятимнинг энг ёрқин дамларига гувоҳ бўлган «Сан Сиро»ни роса соғиндим. Айни дам «Милан» либосини қайта кийиш учун кўп нарсалардан бемалол воз кечган бўлардим. Ўйлашимча, спорт формасини юқори даражада тиклашим ва «Милан»га муҳаббатимни клубга ёрдам бериш асносида исботлашим учун атиги 6 ой етарли.
- Лекин аллақачон футболчилик фаолиятингизга нуқта қўйдингиз ва евроареналарнинг юқори талабларига жавоб беришингиз осон эмас...
- Умуман олганда, расмий учрашувда охирги марта 2023 йилнинг 21 сентябрида иштирок этганман. Лекин интенсив машғулотларни тўхтатганимча йўқ. Демоқчиманки, фақат «Милан» учун фаолиятимни қайта тиклашга тайёрман. Зеро, бу жамоада шунчаки, футболчи эмас, балки шахс сифатида ҳам ўсдим. Асосийси, клубда орттирган тажриба самараси ўлароқ, ҳаётга бошқача назар билан қарашни ўргандим. Албатта, футболга қайтишим деярли имконсиз эканлигини яхши тушунаман, аммо қандайдир мўъжизавий воқелик юз бериб, яна «россонерлар» либосини кийиш насиб этса, ўз ишимга катта фидойилик билан ёндашишим аниқ.
- Собиқ устозингиз Карло Анчелотти эндиликда Бразилия миллий жамоасини шуғуллантирмоқда. Бунга муносабатингиз...
- Ушбу тайинловдан фақат хурсанд бўлдим ва дон Карло билан тез орада юзма-юз кўришишдан умидворман. Бугунги кунда Анчелотти ихтиёрида жуда сифатли номзодларнинг катта рўйхати бор, лекин у муваффақиятга эришиш учун терма жамоага алоқадор барчанинг ёрдамига эҳтиёж сезади. Билишимча, айни пайт Бразилия термасида ғалабага иштиёқ ва ишонч кескин ошган. Бу айнан Анчелоттининг кучли таъсири натижасидир. Табиийки, бўлажак мундиал яқинлашаётган пайт жамоада кўтаринки руҳ шаклланиши жуда-жуда муҳим.
- Айтингчи ҳозирда айнан нималар билан машғулсиз?
- Тадбиркор сифатида турли соҳаларга сармоя киритганман. Шунинг учун асосий вақтни бизнес режаларни назорат қилишга сарфлаяпман. Бундан ташқари, акам билан бирга каттагина спорт залини ишга туширганмиз. Яқинда эса 8та теннис кортини ўз ичига олган клубни сотиб олдим. Бу орқали спорт билан шуғулланишни ихтиёр этган ёшларга профессионал фаолиятни йўлга қўйишларида қўлдан келганича ёрдам бермоқчиман. Шунингдек, баъзи йўналишлар бўйича ўқув-курсларини ташкил этганмиз. Қисқаси, зерикишга вақт йўқ.
Манба: acmilanfan.ru, ХУРШИДБЕК тайёрлади
