«Манчестер Сити» ҳимоячиси Абдуқодир Ҳусанов АПЛ ўйинида майдонга тушган ўзбекистонлик биринчи футболчига айлангани ҳақида кўп ёзилди, етарлича гапирилди. Бу нисбатан қисқа футбол тарихига эга мамлакатимиз учун муҳим лаҳза, албатта. Агар АПЛ тарихига назар солсак, Ўзбекистон жаҳон футболида 1-ўринда турувчи дивизионда ягона вакилга эга бўлган 19-мамлакатдир. Яъни жаҳонда Англия элит лигасида ягона футболчиси ўйнаган ёки ўйнаётган яна 18та мамлакат бор. Демак, қуйида sports.ru сайти маълумотлари асосида АПЛ кенгликлари аро ўз мамлакатининг ягона делегати сифати кўриниш берган ёки бераётган футболчиларга бирров назар соламиз.
Арманистон - Генрих МХИТАРЯН. «МЮ» ва «Арсенал» клублари собиқ ярим ҳимоячиси АПЛ юзини кўрган арманистонлик ягона футболчи сифатида жами 78та ўйин ўтказган - ҳар бир жамоа либосида 39тадан. Генрих шунинг баробарида АПЛдаги 3 мавсум давомида 13та гол ва 14та ассист тўплади. Асосийси, Мхитарян «Юнайтед»даги биринчи мавсумида бир нечта соврин ютди, иккинчисида эса кам ўйнади. У шундан сўнг «Арсенал» сафига қўшилди ва бу жамоада ҳам иккинчи мавсум етарли амалиётсиз қолди. Арманистонлик ярим ҳимоячи шу кўйи «А» серия томон юзланди.
Бангладеш - Ҳамза ЧОУДХУРИ. «Лестер Сити»нинг АПЛдаги 57та ўйинида қатнашган ярим ҳимоячи. Бироқ шундан атиги 2таси футболчи Бангладеш фуқаролигини олганидан кейинги даврга тўғри келади. Боз устига, Ҳамза ҳар иккисида ўйинга захирадан қўшилган. Маълумот учун, вақтида Англия U-21 жамоасининг 7та ўйинида майдонга тушган Чоудхури 2024 йилнинг декабрида ФИФА томонидан Бангладеш термасида ўйнаш учун рухсат олган. У яна 3 кундан сўнг «Лестер»нинг «Вулверхэмптон»га қарши ўйинида захирадан майдонга тушиш асносида расман АПЛда дебют қилган бангладешлик биринчи футболчига айланди.
Гибралтар - Дэнни ХИГГИНБОТАМ. Ушбу рўйхатга тушганлар орасида АПЛда энг кўп ўйин ўтказган футболчи! Денни Хиггинботам она томондан бувиси туфайли Гибралтар миллий жамоасида ўйнаш ҳуқуқини олган ва 2013 йилнинг 19 ноябрь куни Словакия термасига қарши ўртоқлик баҳсида майдонга тушган. Бу гибралтарликлар учун УЕФАга қўшилишдан кейинги илк ўйин эди. Дэнни эса термадаги дебютига қадар АПЛнинг нақ 210та ўйини (!!!)да қатнашишга улгурганди.
Гватемала - Натаниэль МЕНДЕС-ЛАЙНГ. Англиянинг турли ёш тоифасидаги терма жамоаларида ўйнаган яна бир футболчи. Битта жиҳат: Натаниэль мавсум-2017|2018да «Кардифф Сити» учун АПЛда 20та ўйин ўтказганидан анча вақт ўтиб, аниқроғи, 2023 йили Гватемала фуқаролигини олди. Умуман, у фаолиятининг катта қисмида Англия чемпионати тизимидаги иккинчи ва учинчи даражали дивизионларда ўйнади. Дейлик, якунига етган мавсум Чемпионшипда «Дерби Каунти» сафида етарли ўйин амалиётига эга бўлди.
Доминикан Республикаси - Хуниор ФИРПО. «Барселона»дан трансфер қилинган футболчи АПЛдаги дебют мавсумида ҳаммадан кўп сариқ карточка ишлагани (11та) билан эсда қолди. У ҳамон «Лидс» ихтиёрида ва якунланган мавсум жамоанинг АПЛга қайтишида озми-кўп роль ўйнади. Тўғри, Фирпо ҳамон доимий равишда сариқ карточка олади. Лекин факт шуки, у - Доминикан Республикасининг АПЛдаги ягона футболчиси!
Индонезия - Жорди АМАТ. Каталонияда туғилган футболчи 2022 йили спорт фуқаролигини ўзгартириб, Индонезия байроғи остида ўйнашга қарор қилди. Жорди бундан анча вақт муқаддам АПЛда «Суонси Сити» учун 52та ўйин ўтказган ва ўшанда ҳаттоки, Испания миллий жамоаси назарига тушишдан умидвор эди. Амат эндиликда яқиндаги ўз тарихида илк марта Осиё кубоги гуруҳ босқичидан муваффақиятли ўтган Индонезия миллий жамоаси сафида тўп сурмоқда.
Ироқ - Али ал ҲАММАДИ. Ироқ миллий жамоаси ҳужумчиси Англия Премьер-лигасида ҳали бирор марта бошланғич таркибда майдонга тушмади. 22 ёшли футболчи ҳисобида гол ҳам йўқ. Лекин факт шуки, Али «Ипсвич»нинг АПЛдаги 11та ўйинига захирадан қўшилди.
Кения - Виктор ВАНЬЯМА. Асосан спринтерлари билан машҳур Африка мамлакатининг энг машҳур ва муваффақиятли футболчиларидан бири. Виктор Ваньяма АПЛда «Саутгемптон» ва «Тоттенхэм» ярим ҳимоячиси сифатида жами 154та ўйин кўрди. «Шпорлар» ЧЛ-2018|2019 финалига чиқишган вақт Виктор ҳам жамоа таркибида эди.
Куба - Онель ЭРНАНДЕС. «Озодлик ороли» футболининг АПЛдаги ягона вакили мавсум-2019|2020да «Норвич» шарафини ҳимоя қилди - 26та ўйинда 1та гол ва 2та ассист. Ўша мавсум ўйинларнинг аксариятида ҳужумнинг чап қанотида ҳаракатланган Онель самарадорлик бобида мақтанолмаган бўлсада, ҳар 90 дақиқага тўғри келган муваффақиятли дриблинглар сони (2,7та) бўйича АПЛда 13-ўринни эгаллади. Бироқ Кубанинг биринчи ва охирги вакили шу-шу АПЛда бошқа кўриниш бергани йўқ. Биринчидан, «Норвич» охирги мавсумлар асосан Чемпионшипда ўйнади, иккинчидан, Эрнандеснинг ўзи ижара сафарларидан бўшагани йўқ ҳисоби.
Мальта - Дилан КЕРР. Мальтанинг АПЛдаги ягона делегати 1992 йили йўлга қўйилган чемпионатнинг илк мавсуми «Лидс»нинг 5тагина ўйинида жами 286 дақиқа ҳаракатланган эди. Ўша кўриниш Дилан учун АПЛдаги биринчиси ва охиргиси бўлиб қолди.
МАР - Фредерик НИМАНИ. Бу футболчи 2010 йилнинг январида «Бернли»нинг «Болтон»га қарши ўйини (1:0)га захирадан қўшилди ва АПЛда ўйнаган Марказий Африка Республикаси вакиллари рўйхатини очиб берди (15 йилки, Нимани МАР номидан АПЛда дебют қилган ягона футболчи бўлиб қолмоқда). Фредерик яна 1 ойдан сўнг иккинчи марта майдонга тушди - бу сафар «Астон Вилла»га 2:5 ҳисобида ютқазилган учрашувда (яна захирадан). Хуллас, Нимани «Бернли» сафидаги шу 2та ўйинда жами 44 дақиқа ҳаракатланди ва тўпга бор-йўғи 23 марта тегиниб, 10та узатма амалга оширди. Лекин ҳужумчи саналсада, лоақал 1та зарба беролмади рақиблар дарвозаси томон. Оддий айтганда, «Монако»дан ижара келишуви асосида таклиф этилган МАР вакили АПЛда қандайдир каромат кўрсатолмади.
Покистон - Зеш РАҲМОН. Покистон фахри бўлиб турган Раҳмон «Фулхэм»да барчасини жуда яхши бошлади. Дейлик, фаолиятининг бошланғич қисмидаёқ АПЛнинг 21та ўйинида иштирок этгач, кўпчилик уни ёрқин истиқбол кутаётганини тахмин қилди. Бироқ Зеш кейинчалик фақат орқага кетди Чемпионшип - Иккинчи лига йўналиши бўйича. Якунда Раҳмон Таиланд, Гонконг ва Малайзия лигаларида ҳам ўйнади.
Суринам - Райан ДОНК. Марказ ҳимоячиси 2008|2009 йиллар мавсуми «Вест Бромвич»да ижара муддатини ўтади ва 16 марта майдонга тушди (14таси бошланғич таркибда). Райан Донг кейинчалик Бельгия, Туркия ва Испания юқори дивизионларида чамаси 400тача ўйин тўплади, аммо АПЛда бошқа кўриниш бермади. Ёшлар миқёсида Нидерландия термалари шарафини ҳимоя қилган Донк 2015 йили Туркия миллий жамоасидан чақирув олишга умид боғлади (мамлакатда муқим яшагани учун фуқаролик берилишини ўйлаганди), бироқ турклар унинг хизматига эҳтиёж сезишмади. 2021 йили эса Райан Суринам терма жамоаси сафига қўшилди.
Сурия - Маҳмуд ДОУД. Мавсум-2023|2024да ижара келишуви асосида «Брайтон» сафига қўшилган Доуд АПЛда «Боруссия» М. ва «Боруссия» Д. клубларидаги каби барқарор ўйнолмади. Асосийси, мавсум ўрталарида Бундеслигага қайтишига қадар АПЛнинг 9та ўйинида майдонга тушиб, бу ишни уддалаган суриялик биринчи футболчи бўлди. Аслида тажрибали ярим ҳимоячи Германия миллий жамоаси сафида 2та ўйин ўтказган, фақат ўртоқлик даражасида. 2024 йили эса Маҳмуд Доуд ниҳоят, Сурия термасида ўйнаш таклифини қабул қилди.
Танзания - Мбвана САМАТТА. АПЛ-2019|2020нинг иккинчи ярмида «Астон Вилла»даги 6 ойлик даврда 14та ўйинда майдонга тушган ҳужумчи. Эътиборлиси, Танзаниянинг ягона вакили Премьер-лигадаги дебютидаёқ «Борнмут» дарвозасига гол урди, аммо Бирмингем жамоаси якунда мағлубиятни тан олди. Ўша гол АПЛда жами 946 дақиқа ҳаракатланган ва рақиблар дарвозасига 17 марта зарба йўллаган Мбвана учун ягоналигича қолди. Айтганча, «Астон Вилла» мавсум якунида қуйи лигага тушиб кетмаслик миссиясини бир амаллаб уддалади, Саматта эса Туркиянинг «Фенербахче» клубига йўл олиб, Англияга бошқа қайтмади.
Уммон - Али ал ҲАБСИЙ. 2007-2013 йиллар оралиғида «Уиган» ва «Болтон» учун АПЛда нақ 111та ўйин ўтказган дарвозабон. Уммонлик кипер жумладан, Англия элит дивизионидаги охирги мавсуми «Уиган»нинг ажралмас қисмига айланган ва Англия кубоги-2013ни қўлга киритганди. Тўғри, кубок турнирининг аввалги босқичларида мунтазам майдонга тушган дарвозабон «Манчестер Сити»га қарши кечган финални захира ўриндиғида кузатганди.
Фарер ороллари - Гуннар НИЛЬСЕН. Фарер ороллари миллий жамоаси учун 70тадан ортиқ ўйин. Асосийси, Гуннар Нильсен митти мамлакатнинг АПЛда ўйнаган ягона вакили бўлиб қолмоқда ҳамон. Эътиборлиси, у Англия юқори дивизионида бор-йўғи 1 марта майдонга тушган. Лекин қандай таранг вақтда-я. Роберто Манчини бошқарувидаги «Манчестер Сити»да учинчи дарвозабон саналган Нильсен мавсум финишига яқин, яъни апрель ойида «Арсенал»га қарши кечган сафар ўйини қайдномасига киритилди. Ўйин тугашига 14 дақиқа қолган паллада эса «Сити» дарвозабони Шей Гивен жароҳатланди ва италиялик мутахассис Нильсенни мажбурий ҳолда жангга ташлади. Айтиш жоиз, 90-дақиқада Никлас Бендтнер зарбасини бартараф этган Гуннар ўз дарвозаси дахлсизлигини сақлаб қолди. Факт: у АПЛдаги фаолиятини 100 фоиз омадли «сэйв» билан якунлаган.
Филиппин - Нил ЭТЕРИЖ. Лондонда туғилган дарвозабон. Нил онаси туфайли Филиппин терма жамоасида ўйнаш ҳуқуқини олди. Айтиш керак, у халқаро дебютини АПЛда кўриниш беришидан анча олдин бошлаганди. Англия юқори лигасидаги статистикасига келсак, мавсум-2018|2019 доирасидаги 38та ўйинда «Кардифф Сити» дарвозасини қўриқлади.
С.РАҲМОНОВ тайёрлади
