«Андижон» клубининг собиқ мураббийи, ҳозирда «Олимпик» жамоасини бошқараётган Артём Петросян «Финт Тўраева» подкастида бир соатдан ортиқ вақт давомида жуда кўп саволларга жавоб берди. Қуйида ана шу суҳбатнинг энг қизиқарли қисмини эътиборингизга ҳавола қиламиз.
- Артём, Ўзбекистон кубоги финалига тайёргарликда қандай ҳолатда эдингиз (Ўзбекистон Кубоги-2024 финалида «Андижон» «Навбаҳор»ни 3:2 ҳисобида мағлуб этганди - PS)?
- Ҳар бир ўйинга бир хил тайёргарлик кўрамиз, деган гап буткул тўғри эмас. Машғулотлар асосан тактика ва рақибни таҳлил қилишга қаратилган. Лекин финалдаги эмоционал ҳолат, илк бор шундай руҳий куч пайдо бўлиши, футболчилар учун катта аҳамиятга эга бўлди.
- Ўйинчиларни руҳлантириш учун нималар қилдингиз?
- Фақат «зўр бўлинг» деб айтмадим. Финалдан олдин, болалар учун мотивацион видеолар тайёрладик, рақибларнинг кучли ва заиф томонларини таҳлил қилдик. Бу уларга ишонч берди ва руҳий тайёргарликни мустаҳкамлади.
- Мотивацияни қандай сақлайсиз?
- Мотивация фақат сўзда эмас, амалда кўрсатилиши керак. Мен доим айтаман: «Ҳар куни ўзингизни кечагидан яхшироқ қилинг». Асосий манба — ишонч. Агар ўйинчи мураббийга ишонса, ҳар қандай шароитда ўйнай олади.
- Қийин даврлар бўлганида, мотивацияни қандай сақлайсиз?
- Қийин пайтда ҳамма сустлашади, бу табиий. Лекин мен доим айтаман: «Муваффақият йўли — енгил йўл эмас». Бизда шундай қоида бор: ҳар бир мағлубиятдан кейин, учрашув ўтказамиз ва «нега юта олмадик?» эмас, «қайси жиҳатни яхшилаймиз?» деган саволни қўямиз. Бу мотивацияни сақлаб туради, чунки одамлар айбдорликни эмас, имкониятни кўради.
- Ўзбекистон футболида асосий муаммолар нимада?
- Тизимда барқарорлик йўқ. Ҳар бир жамоа ва мураббий ўз услубида ишлайди, натижада футболчи турли мактаб таъсирида қолади. Уни ҳал қилиш учун ягона методика, ўқув тизими ва селекция қоидалари керак. Шу билан бирга, мураббийларнинг малакасини ошириш ҳам муҳим.
- Жамоаларда инфратузилма ва моддий шароитлар ҳақида нима дейсиз?
- Баъзи шаҳарларда майдонлар ёмон, база йўқ. Яхши шароитсиз юқори даражадаги ўйин кутиш қийин. Футбол фақат техникадан иборат эмас, муҳит ҳам муҳим.
- Легионерлар масаласи ҳақида фикрингиз?
- Агар легионер кучли ва ёшларга намуна бўлса — бу фойдали. Фақат статистика учун келган футболчи эса ёрдам бермайди. Мақсад — маҳаллий футболчилар билан рақобат муҳитини яратиш.
- Энди Ўзбекистон кубоги финали ҳақида ҳам гаплашайлик.
- Финалгача осон йўл бўлмади. Жароҳатлар кўп ва руҳий босим ҳам етарлича бўлган, лекин ишонч ҳамиша бор эди. Тайёргарликда руҳий жиҳатга катта аҳамият бердик ва рақибни таҳлил қилдик. Финалда энг асосий омил — жамоавийлик ва ишонч эди.
- Келажак режаларингиз ва ёшлар билан ишлаш ҳақида?
- Мен ўз билимимни ёшлар билан бўлишишни мақсад қилганман. Сабр ва индивидуал ёндашув муҳим. Ҳар бир футболчи бошқача, шунинг учун ҳар бирининг имкониятларини ривожлантириш керак. Академиялар ва спорт мактабларида ягона стандарт ва малакали мураббийлар бўлиши зарур.
Манба: «Финт Тураева» подкасти
