Футбол маъносида айтсак, нисбатан сокин июль аста ўз ўрнини шовқинли августга бўшатиб берди. Йилнинг ҳисоб бўйича 8-ойи футбол воқеликларига бой, чиндан ҳам. Мана, Суперлигамиз қайта қўзғалишга улгурди, бир томонда халқаро ўйинлар кутиб турибди. Хўш, жорий ойда бизни бефарқ қолдирмайдиган қандай халқаро турнирлар-учрашувлар ёки воқеликлар бор?
2-10 август: U-20 тоифасидаги ОК-2026 (аёллар) саралаши
2 август куни 2026 йилнинг 1-18 апрель кунлари Таиландда бўладиган U-20 тоифасидаги қитъа чемпионати (аёллар) саралаши бошланди. 33та жамоа иштирок этадиган (8та гуруҳда) квалификацион раундга финал босқичининг 11та йўлланмаси тикилган. Якунда 8та гуруҳ ғолиби ҳамда 2-ўрин эгалари орасида натижаси яхшироқ 3та жамоа Осиё чемпионатида қатнашиш ҳуқуқини қўлга киритади. Яна бир чипта мезбон Таиланд термасига тегишли. Ўзбекистон U-20 термаси жой олган гуруҳ ўйинларига Тошкент («Дўстлик» стадиони) мезбонлик қилмоқда. Рақиблар - Иордания, Ш.Мариана ороллари ва Баҳрайн.
7 август: ўсмирлар ва қизлар ўртасида U-17 тоифасидаги Осиё чемпионати-2026 саралаши қуръаси
2 кундан кейин ўсмирлар ва қизлар ўртасидаги навбатдаги қитъа чемпионати саралашига қуръа ташланади. Ўсмирлар мусобақасига яна С.Арабистони мезбонлик қилса, қизлар чемпионати Хитойда ташкиллаштирилади. Режага кўра, саралаш баҳслари кузда бўлади.
12 август: Элит ОЧЛ-2025|2026 саралаши («плей-офф»)
Элит турнирда қатнашадиган 24та жамоадан 22таси маълум. Оддий айтганда, «Ғарб» ва «Шарқ»да 1тадан йўлланма тақдирига ойдинлик киритиш қолди. «Ғарб»да «Ал-Дуҳайл» (Қатар) - «Сепаҳон» (Эрон), «Шарқ»да эса «Ченгду» (Хитой) - «Бангкок Юнайтед» (Таиланд) ўйини бор. 2та жуфтлик ғолиби Элит ОЧЛ гуруҳ босқичига йўл олса, мағлуб жамоалар ОЧЛ-2га тушади. Дарвоқе, 12 август куни учинчи даражали турнир - «Чақирув кубоги» саралаш ўйинлари («плей-офф») ҳам ўтказилади.
13 август: ОЧЛ-2-2025|2026 саралаши («плей-офф»)
ОЧЛ-2 гуруҳ босқичида 32та жамоа 8та квартетда курашга киришиши керак. Саралаш, яъни «плей-офф»да 3та ўйин бор: «Гоа» (Ҳиндистон) - «Ал-Сиб» (Уммон), «Регар ТадАЗ» (Тожикистон) - «Аҳал» (Туркманистон) ва «Персиб» (Индонезия) - «Манила Диггер» (Филиппин).
15 август: Элит ОЧЛ ва ОЧЛ-2 гуруҳ босқичи қуръаси
Эслатма, Элит ОЧЛ-2025|2026 асосий босқичи «Ғарб» ва «Шарқ» минтақаларида 12тадан жамоа иштирокида олиб борилади. Регламент бўйича ҳар бир жамоа ўз майдони ва сафарда 4тадан ўйин ўтказади (худди ўтган мавсумдаги каби). Жамоалар рақиблари ва қай бири билан қаерда ўйнашини эса махсус компьютер ёрдамида ташланадиган қуръа аниқлаб беради. Демак, «Насаф»нинг рақиблари ва ўйинлари тартиби билан 15 август куни танишамиз. «Андижон»нинг ОЧЛ-2 гуруҳ босқичидаги рақиблари ҳам шу куни аниқ бўлади.
25-31 август: Аёллар ўртасидаги ОЧЛ саралаши
Ўтиш турнирида Ўзбекистон чемпиони «Севинч» ҳам иштирок этади, фақат «Насаф» номи остида. Қаршиликлар гуруҳ босқичига чиқиш учун АПФ (Непал), «Ал-Наср» (С.Арабистони) ва «Осиё коллежи» (Таиланд) клублари жой олган квартетда 1-ўринни эгаллашлари керак. Саралаш ўйинлари Қаршидаги «Марказий» стадионида бўлади:
25 август. 20:30 «Насаф» - АПФ (Непал)
28 август. 20:30 «Ал-Наср» (Саудия Арабистони) - «Насаф»
31 август. 20:30 «Осиё коллежи» (Таиланд) - «Насаф»
Шунингдек...
Август ойи охирида Тошкент ва Душанбе шаҳрида CAFA чемпионати гуруҳ босқичи ҳам стартга чиқади (тақвим олдинроқ эълон қилинган, кейинроқ яна алоҳида маълумот берилади, албатта). Қолаверса, 28 август куни «Чақирув кубоги» гуруҳ босқичига қуръа ташланади. Европада эса навбати билан миллий лигалар бошланади. Жумладан, кучли 5та лиганинг янги мавсуми карвони йўлга тушади. Дейлик, ҳаммани бирдек қизиқтирадиган АПЛнинг 1-тур баҳслари 15-18 август кунларига белгиланган.
