«Челси» ҳар доимгидек ёзда жуда фаол. Ҳар йили янги футболчиларни харид қилади. Бу гал ҳужум чизиғи тўла-тўкис янгиланади. Агар позициялар бўйича қарайдиган бўлсак, янги ўйинчилар олдинги чизиқда пайдо бўлишлари мантиқан тўғри. Клубда дисбаланс юза келган: ажойиб ярим ҳимоя ва нўноқ ҳужум чизиғи. Дарҳақиқат, майдон марказини топ-футболчилар эгаллашган: Мойсес Кайседо, Энцо Фернандес ва Коул Палмер.
Янги мавсумда бир йил аввал «Палмейрас»дан харид қилинган Эстевао ҳам етиб келади. «Ипсвич»дан ўтган Лиам Делап, «Брайтон» вакили Жоао Педролар «Челси» сафида бинойидек тўп суришмоқда. Бундан ташқари, «Боруссия Дортмунд»нинг чап қанот вингери Жейми Гиттенснинг трансфери ҳам расман тасдиқдан ўтган.
Хуллас, таркибда 4 нафар янги футболчи пайдо бўлади. Лекин Жейдон Санчо «кўклар»ни тарк этди. Боз устига, бунинг учун «Челси» пул ҳам тўлайди. Чунки ижарадан кейин кетаётган Санчонинг шартномасида мажбурий тўлов қайд этилган. Жарима - 5,8 млн. евро. Бироқ Санчосиз қолганда ҳам ҳужумкор ўйинчилар сони меъёрдан ортиқ:
* Жоао Педро;
* Жейми Гиттенс;
* Эстевао Виллиан;
* Лиам Делап;
* Педру Нету;
* Николас Жексон;
* Марк Гиу;
* Жоау Феликс;
* Раҳим Стерлинг;
* Кристофер Нкунку;
* Датро Фофана;
* Михаил Мудрик;
* Тайрик Жорж;
* Армандо Броя.
Демак, «Челси»нинг 3та позицияси 15 кишидан иборат. Гарчи Педро ва Феликсда ҳужумчи ортида ўйнаш тажрибаси бўлсада, бу уларнинг асосий позициялари эмас. Рўйхатнинг охиридаги 2 нафар футболчи - клуб тарбияланувчилари. Қолган барча ўйинчиларни янги соҳиблар харид қилишган. Уларнинг аксарияти узоқ муддатли шартнома соҳиблари. Фақат Стерлинг билан Жоржнинг контракти 2 йилга мўлжалланган.
Табиийки, футболчиларнинг кўпчилигини бошқа клубларга сотиб юбориш талаб этилади. Афтидан, айни паллада кўпроқ ижара варианти кўриб чиқилса керак. Бошқа усулларда харидорни қизиқтириш жуда қийин. Масалан, «Арсенал»га ижарага берилган Стерлинг маошининг 70 фоизини «Челси»нинг ўзи тўламоқда. Мудрикнинг масаласи янада оғирроқ - допингга оид можаро туфайли, шу йилнинг ёзида уни бошқа жамоага ўтказишнинг иложи йўқ.
Энг қизиғи, сўнгги учрашувларнинг бирида «Челси» бош мураббийи Энцо Мареска майдон марказига қўшимча ярим ҳимоячи Ромео Лавиани туширган, Палмер эса ҳужумчилар учлигига ўтганди. Бундай вазиятларда нима учун жамоага шунча вингер керак эканлигини тушуниб бўлмайди. Айрим фикрларга кўра, шунча ўйинчилар ижарада тўп суриб, кейин «Челси»ни кучайтирадилар. Аслида, бунақа футболчилар шу пайтгача бўй кўрсатишлари керак эди. Бироқ 1, 2 ёки 3 йил ижарада юриб, кейин «Челси»ни кучайтирган бирорта футболчини айта оласизми? Бундай ўйинчи йўқ. Чуквуэмека, Угочукву ва бошқа ажойиб инсонлар ҳанузгача заифлар. Охирги мавсумни олсак, Андрей Сантос ва Майк Пендерс яхши ўйин намойиш этишди.
Қисқаси, ўйинчиларнинг кўпчилиги яроқли эмас, лекин шартномалари узоқ муддатли. Масалан, Жексоннинг келишуви яна 8 йил, 2033 йилгача ўз кучида қолади. Бироқ ўзи «Челси»нинг талаби даражасида тўп сура олмаяпти. Биринчи навбатда руҳий жиҳатдан - интизом бобида бундай муаммо АПЛдаги бошқа бирорта футболчида йўқ.
Шундай шароитда «Челси» 3 йил ичида 1,5 млрд. еврога яқин маблағ сарфлади, ҳужум чизиғи эса, ҳамон ўртамиёна савияда. Бундай шароитда кўпинча клуб ҳаражатнинг деярли ярмини оқлади, деган хулосага келинади. Бироқ бу ерда андак нозик тафовут бор. Ишлаб топилган 500 млн. евро - Роман Абрамович давридаги ўйинчиларнинг маблағи. Бу маблағнинг қанчаси ЕЧЛда зафар қучган футболчиларга текканлиги шубҳа остида. Албатта, «кўклар» тарихида Палмер трансфери каби муваффақиятли келишувлар ҳам бор.
Масаланинг иқтисодий жиҳатини четга суриб, фақат натижаларга эътибор берадиган бўлсак, бир томондан, шак-шубҳасиз юксалиш бор - жамоа мавсумдан мавсумга муваффақиятли тўп сурмоқда. Лекин ҳозирги таркиб билан ЕЧЛ ва АПЛда ғолиб чиқиш қийин. Фикримизча, ҳар қайси позицияга 4 эмас, 2 нафардан ўйинчи олиш кўпроқ самара беради. Шунда бир нафар ўйинчининг баҳоси 100 млн. евродан кўпроқ бўлади. Кайседо ва Фернандесни инобатга олганда, бу ёндашув ўзини оқлайди. «Челси»нинг турли мусобақаларда иштирок этиши тушунарли. Лекин энди ҳужум чизиғига топ-ўйинчилар янада кўпроқ етишмай қолиши аниқ. Марк Гиу Ирландиянинг «Шэмрок Роверс»ига қайд этган хет-трикни КЛда амалга ошириши мумкин. Бироқ ЕЧЛда бундай юксак кўрсаткичга эришиш осон эмас.
