«Арсенал» таянч ҳудудида кескин ўзгаришларни амалга оширмоқда: мавсум якунланиши билан клубнинг икки нафар ярим ҳимоячилари - Жоржиньо ва Томас Партининг шартнома муддатлари ниҳоясига етганди. Жоржиньо «Фламенго»га йўл олиб, КЖЧда иштирок этишга ҳам улгурди. Партининг вазияти анча мураккаб: маълумотларга кўра, «Арсенал» ганалик футболчи билан амалдаги шартнома муддатини узайтириш ниятида эди. Бироқ Англияда анчадан бери Партининг шаҳвоний муносабатларга ҳирс қўйганлиги хусусида миш-мишлар юради. Гарчи шу пайтгача ҳеч нарса расман исботланмаган бўлсада, ижтимоий тармоқлар фойдаланувчилари Томаснинг айбдорлигига аминлар, мухлислар эса стадионларда ҳуштакбозлик билан кутиб олишарди. Хуллас, «тўпчилар» клуб обрў-эътиборига доғ туширишни истамадилар ва Партига янги шартнома таклиф этмадилар.
Хабарларга биноан, бошланғич таркибнинг доимий аъзоси бўлмаган, лекин паллада жамоага ўз тажрибаси билан ёрдам бериб келган Жоржиньо ўрнини «Брентфорд»нинг 31 ёшли ўйинчиси Кристиан Нергор тўлдиради. Парти ўрнига эса, «Арсенал» Евро-2024 турнирида ғолиб чиққан «Реал Сосьедад» ўйинчиси Мартин Субимендини харид қилди. 65 млн. евроли трансфер қийматини «Арсенал» бир неча босқичда тўлашга келишиб олди.
«Арсенал» дебютанти - икки собиқ таянч ярим ҳимоячининг гибриди
Субименди Сан-Себастьянда туғилиб, шу пайтгача фақат «Реал Сосьедад» тизимида ўсмирлар жамоаларидан асосий жамоага қадар етиб келган. Ўз вақтида Мартинга «Реал Сосьедад Б»да сабоқ берган Хаби Алонсо унга қуйидагича таъриф берганди:
«Унда ўйинни таҳлил қилиш, жамоадошлари билан янада яхшироқ ҳамжиҳатликка эришиш қобилияти бор. Кейинги қадами қандай бўлиши кераклигини Мартин ҳали тўп унга етиб келишидан аввалроқ белгилаб олади».
Субимендининг Ла Лигадаги ўйинларидан бехабар бўлган, лекин унинг ихтисосини тушуниб олишни истаган «Арсенал» мухлислари учун «Мартин - Жоржиньо ва Партининг чатишмаси» ибораси етарли бўлади. Жоржиньонинг ўйин услубига юксак даражадаги назорат мос келади. Лекин тўп билан ҳаракат қилган ҳолда ҳужумни ривожлантиришга интилиши ўз фантазиясининг маҳсули. Парти эса аксинча, баъзан эътиборсизликка берилиб, орқа чизиқда кераксиз тартибсизликка йўл қўйса, олдинги чизиқда ўта нафис ва самарали тўп сурарди. Масалан, «Стэмфорд Бриж»даги ўйинда урилган Мартинеллининг голи шу ажиб нафислик маҳсули эди.
Субименди эса бир томондан таянч ярим ҳимоячиси сифатида ўз ўйин услубини намойиш этса, бошқа томондан, тезликни ўзгартириб, тўпни чизиқлар оралиғидан олиб ўтади. Мартиннинг МЛ-2025 турнири финалидаги шундай ҳаракатлари Португалия терма жамоаси ҳимоячиларини анча шошириб қўйганди.
Микель Артета дуэлларда ғолиб чиқадиган ўйинчиларни ёқтиради. Субименди - айнан у излаган футболчи. Сўнгги 3 мавсумда Мартин «Реал Сосьедад» таркибида 329 марта тўпни жамоадошларига қайтариб берган ва ярим ҳимоячилар ўртасида Ла Лигадаги энг яхши кўрсаткични қайд этганди. Ҳа, Суби ҳамма ёқни тозалаб ва йўқ қиладиган таянч ярим ҳимоячисига ўхшамайди ва бунга интилмайди ҳам. Чунки жамоада ҳамма Райс каби атлет бўлиши шарт эмас.
Артета Мартинда ўзининг юксак спорт формасидаги нусхасини кўрди
Испания-Франция учрашувининг 25-дақиқасида Микель Мерино томонидан урилган голда ҳам Субимендининг ҳиссаси катта бўлганди. Ўшанда Мартин тўпни кучли зарба билан марказий чизиқдан етказиб берганди.
Ўтган мавсумда «Арсенал»га айнан шунақа узатмалар етишмаганди. Ваҳоланки, ўтган мавсумда яхши спорт формасидаги Парти жамоа сафида эди. Ажабтовур статистика: 2024|2025 йиллар мавсумини «тўпчилар» ҳар бир ўйинда марказ бўйлаб йўлланган узатмалар бўйича (3,7) АПЛнинг энг ношуд жамоаси бўлишди. 19-ўриндаги «Ноттингем Форест» 4,6 баллга, 18-ўриндаги «Вулверхэмптон» 4,7 баллга эга бўлишганди.
Шундан кейин «тўпчилар» ўйинни қанотларга кўчириб, асосий масъулиятни Букайо Сака зиммасига юкладилар. У жароҳат олиб, таркибни тарк этгач, вазият янада жиддийлашди. Артета даврида чап қанотда тўп сураётган Габриэл Мартинелли фақат очиқ бўшлиқда самарали ўйнайди. 17 ёшли Итан Нванери қисман Саканинг ўрнини босган бўлсада, узоқ муддатга қуввати етмади.
Охир-оқибат, АПЛ мавсумининг якуний босқичида «Арсенал» ҳар битта голни катта қийинчилик билан урадиган бўлиб қолди. Ҳатто «Вест Хэм»дек заиф жамоа ҳам «Эмирейтс»да ўз дарвозаси дахлсизлигини сақлай олди. Умуман, иккинчи даврада «Арсенал» атиги икки марта иккитадан кўпроқ гол уришга муваффақ бўлди - чемпионликка даъвогар жамоа учун ўта аянчли кўрсаткич.
Чаққон ва уддабурон Субименди - айнан шунақа жамоага керак ўйинчи. Унинг самарали алдамчи ҳаракатлари 66,7 фоизга тенг. Ўта юксак кўрсаткич!
Мартин Субименди билан «Арсенал» таркиби янада кучайишига шубҳа йўқ. Лекин жамоага Виктор Дьокереш даражасидаги топ-ҳужумчи ёки Беньямин Шешкодек иқтидор керак. Шунда «тўпчилар» яна 2-ўрин билан кифояланиб қолмай, ўз таркибини Флориан Вирц билан кучайтириб олган «Ливерпул»дан совринни тортиб олиш учун курашишга тайёр бўладилар.
Манба: sport-express.net, Содиқ СОБИР тайёрлади
