Бугун пойтахтимиздаги “Hilton” меҳмонхонасининг анжуманлари залида Ўзбекистон Суперкубоги-2025 учрашувига расмий меҳмон сифатида таклиф этилган Жаҳон футболи афсоналари билан матбуот анжумани бўлиб ўтди. Эркин ва самимий руҳда ўтган тадбир давомида оммавий ахборот воситалари вакиллари ўзларини ҳамда мухлисларни қизиқтираётган барча саволларига атрофлича жавоб олишди.
Савол: Замонавий футболда ҳимоя чизиғи қай даражада кучайган. Сиз ўйнаган ва жаҳон чемпиони бўлган даврдаги Италия терма жамоаси кучлими ёки айни пайтда фаолият юритаётганими?
Фабио Каннаваро: - Менинг фикримча 2006 йилда жаҳон чемпиони бўлган терма жамоамиз кучлироқ эди. Боиси ҳамма чизиқда энг маҳоратли, бетакрор ўйинчилар жамланишганди. Бежизга чемпион бўлмаганмиз. Замонавий футболда ҳимоя қанчалик кучайган деган савол анча кенг қамровли. Ҳозирги футболда ҳимоячи фақат тўпни олиб юрган рақибга қарши ўйнамасдан, бутун майдонни ва унда бўладиган воқеалар ривожини олдинда кўра билиши керак. Бошқача айтганда бутун майдонни назорат этиб туриши лозим. Айни пайтда ҳимоячининг ваколат доираси кенгайган.
