Жаҳон футболи афсоналарининг мамлакатимизга ташрифи кеча якунига етди ва улар тунда ўз ватанларига жўнаб кетишди. Юлдузлар уйларига қайтишган бўлишса-да, уларнинг атрофида ташкил этилган тадбирлар, воқеалар шукуҳи ҳали давом этмоқда.
Хусусан, Ўзбекистон футзал федерацияси раҳбарияти пойтахтимиздаги "Ҳилтон" меҳмонхонасида Жаҳон футболи афсоналарини қабул қилди. Дўстона руҳда кечган суҳбат жараёнида ЎФФ Президенти Бекзод Маматқулов Жаҳон футболи афсоналарига Ўзбекистонга ташрифи ҳамда мамлакат Суперкубоги доирасидаги тадбирларда иштироки учун миннатдорлик билдирди. Кўп йиллар давомида ўзларининг ажойиб ўйинлари билан ўзбек футболи ишқибозлари қалбидан жой олган юлдузларнинг мамлакатимизга келиши, тадбирларда қатнашиши, мухлислар билан фотосуратларга тушиш, дастхат улашишлари кўпчиликка манзур бўлганини таъкидлаб ўтди.
Қабул маросими якунида Жаҳон футболи афсоналарига эсдалик совғалари топширилди ва эсдалик учун суратга тушишди.
