Бизнинг давримизда профессионал футболчилар контрактларининг қиймати муҳим роль ўйнайдиган бўлиб қолди. Кўпчилик ўйинчилар шайхлар ёки осиёликлар таклиф этган мўмай даромадга учиб, фаолиятларини ўша ёққа кўчирадилар. Лекин Европанинг ўзида ҳам қандайдир шартли «Реал» ва унинг пули учун ўзининг қадрдон жамоасидан воз кечадиган футболчилар йўқ эмас. Бироқ футбол тарихида шундай ўйинчилар ҳам борки, жонажон жамоаларига бўлган садоқатни четдан келадиган манфаатли устун қўядилар. Ҳикоямиз шундай чинакам афсоналар ҳақида.
«Ювентус» ва афсонавий учлик
Туриннинг «Ювентус» клуби тарихида жуда кўп юлдузлар тўп суришган. Уларнинг айримлари ўта оғир даврда - келишилган ўйинларда айбланган «Ювентус» «В» Серияга қувғин қилинганида ҳам жамоани тарк этишмаган.
Жоржо Кьеллини
Италиялик ҳимоячи 2005 йилдан 2022 йилга қадар «Ювентус» шарафини ҳимоя қилган, 424та ўйинда 27та гол урган. Кьеллини 9 марта Италия чемпиони бўлган, 5 мартадан Италия Кубоги ва Суперкубогини қўлга киритган. Жоржо А+Шнинг «Лос-Анжелес» клубида 1,5 йил тўп суриб, 2023 йилнинг 12 декабрида фаолиятини якунлаган.
Жанлуижи Буффон
Италиялик дарвозабон «Ювентус» либосида 2001-2018 ва 2019-2021 йиллар оралиғида тўп сурган. Ўз фаолияти давомида 526 марта майдонга тушиб, 394та гол ўтказиб юборган. Буффон Турин гранди билан 10 марта «А» Серияда ғолиб чиққан, 5 марта Италия Кубоги ва 6 марта Суперкубогига сазовор бўлган. ЕЧЛнинг 3 карра финалчиси. Футболчилик фаолиятини 2023 йилда «Парма» клубида ниҳоясига етказган.
Алессандро Дель Пьеро
Италиялик ҳужумчи «Ювентус» сафида 19 йил, 1993 йилдан 2012 йилгача тўп сурган, 513та ўйинда 208та гол урган. Дель Пьеро ўз жамоаси билан 6та Италия чемпионлиги, 1та Кубок ва 4та Суперкубокни қўлга киритган. Шунингдек, 1 мартадан ЕЧЛ, УЕФА Суперкубоги ва Интертото Кубогига сазовор бўлган, қитъалараро Кубок соҳиби бўлган.
Антон Шунинг ва Москва «Динамо»си
Москванинг «Динамо» клуби дарвозабони Антон Шунин 2007 йилнинг 21 апрелида жамоадаги дебютини нишонлаган. 2024 йилнинг 1 июлида эса шартнома муддати тугагани муносабати билан ҳамкорликни якунлаган. Шунин қадрдон жамоасидаги жами (366) ва гол ўтказмаган (125) ўйинлар сони бўйича клуб тарихидаги 2-натижани қайд этган жамоа билан 3 марта бронза медаллари соҳиби бўлган.
Марсело ва «Реал»
Бразилиялик ҳимоячининг «Реал»даги фаолияти 2007 йил январидан 2022 йил ёзига қадар давом этган. У «қаймоқранглилар» сафида 387 марта майдонга тушиб, 26та гол урган. 2022 йилда ЕЧЛда ғолиб чиққан Марсело клубни тарк этишини эълон қилди. 2025 йилда эса фаолиятини якунлади. Марсело «Реал» таркибида 6 марта чемпионликка эришди, 2та Кубок ва 5та Суперкубокка эга бўлди. Шунингдек, ЕЧЛда 5марта, УЕФА Суперкубогида 3 ва КЖЧда 4 марта ғолиб чиқди.
Бруно Сориано ва «Вильярреал»
Испаниялик ярим ҳимоячи «Вильярреал» сафида 2006 йилдан 2020 йил ёзига қадар ўйнаган. Шу давр ичида футболчи 324 марта майдонга тушиб, 24та гол урган. Агар жароҳатлар бўлмаганида, Сориано кўпроқ ўйнаган бўларди.
Франческо Маньянелли ва «Сассуоло»
Камтарин «Сассуоло» шарафини 2005 йилдан 2022 йилгача ҳимоя қилган ярим ҳимоячи ўйинлар сони (520) бўйича клуб рекордини ўрнатган ва жамоанинг «С» Сериядан элитага кўтарилишига салмоқли ҳисса қўшганди.
Лоик Перрен ва «Сент-Этьен»
Франциялик ҳимоячи катталар футболидаги умрини (2003-2020) «Сент-Этьен»га бағишлаган. У 391та ўйинда 27та голни расмийлаштирган. Перрен - Франция Лига Кубогининг соҳиби.
Франческо Тотти ва «Рома»
Италиялик ҳужумкор ярим ҳимоячи 1993,2017 йиллар оралиғидаги бутун фаолиятини «Рома»га бағишлаган ва 619та ўйинда 250та гол урганди. «Император» пойтахт клуби билан 1 марта «А» Серияда ғолиб чиққан ва 2 мартадан Италия Кубоги ва Суперкубогига эга бўлганди.
Райан Гиггз ва «МЮ»
Уэльслик ярим ҳимоячи эса ўзининг футболдаги бор маҳоратини 1990-2014 йиллар оралиғида «қизил иблислар»га ҳадя этган ва 672та учрашувда 114 марта рақиблари дарвозасини ишғол этган. Райан ўз жамоаси билан 34та соврин соҳибига айланган:
• 13та чемпионлик унвони;
• 4та Англия Кубоги;
• 3та футбол лигасининг Кубоги;
• 9та Англия Суперкубоги;
• 2та ЕЧЛ Кубоги;
• 1 мартадан УЕФА Суперкубоги, +итъалараро Кубок, КЖЧ ғолиблиги ва Англия Ёшлар кубоги.
Паоло Мальдини ва «Милан»
Италиялик ҳимоячининг клубдаги фаолияти «Милан» билан боғлиқ. Паоло 1984 йилдан 2009 йилгача «россонерлар» шарафини ҳимоя қилиб, 647та беллашувда 33та голни расмийлаштирди. Мальдини ўз жамоаси билан жами 26та, 7та чемпионлик соврини, 1та мамлакат Кубоги ва 5та Суперкубокка сазовор бўлди, 5 мартадан ЕЧЛ ва УЕФА Суперкубоги баҳсларида ғолиб чиқди, КЖЧда зафар қучди ва 2 марта қитъалараро Кубок соҳиби бўлди.
Александр Шовковский ва Киевнинг «Динамо»си
Шовковский 1992 йилдан 2016 йилгача Киев клубининг шарафи ва дарвозасини муносиб ҳимоя қилиб, 426та ўйинда 258 марта ўз дарвозасидан тўп олиб чиққанди. Дарвозабон коллекциясида 31та соврин - 14та чемпионлик унвони, Украинанинг 11та Кубоги ва 6та суперкубоги бор.
Пол Скоулз ва «МЮ»
Англиялик ярим ҳимоячи 1993 йилдан 2013 йилгача ўзини «МЮ»га бағишлаб, 499 марта майдонга тушган ва 107та гол урганди. Шу давр ичида Скоулз 11 карра чемпионга айланди, 3 марта Англия Кубоги ва 5 марта Англия Суперкубогини, 2 марта лига Кубогини қўлга киритди. Шунингдек, 2 марта ЕЧЛда, 1 мартадан қитъалараро кубок ва КЖЧда ғолиб чиқди.
Хави Лопес ва «Эспаньол»
Энди навбатни яшил майдондаги фаолиятини фаол давом эттираётган афсоналарга берамиз. Ўз вақтида «Бетис» тарбияланувчиси бўлган Хави Лопес 2009-2020 йилларда «Эспаньол» таркибида ўйнаган ва 252 марта майдонга тушиб, 2та гол урганди. Айни паллада футболчи Австралиянинг «Аделаида Юнайтед» клуби шарафини ҳимоя қилмоқда.
Сэмми Боссют ва «Зюлте-Варегем»
1985 йилда туғилган дарвозабон 2006 йилда ҳозирга қадар «Зюлте-Варегем» таркибида тўп сурмоқда. У 378 марта майдонга тушиб, 556 марта ўз дарвозасидан тўп олиб чиққан.
Лионель Месси ва «Барселона»
Месси - рўйхатимиздаги энг совриндор ўйинчи, «Олтин тўп» мукофотининг кўп карра соҳиби. Аргентиналик ҳужумчи 2003-2021 йилларда «Барселона» шарафини ҳимоя қилиб, 520та ўйинда 474та гол урган. Лео Каталония гранди билан 10 марта Ла Лига ғолиблигига сазовор бўлган, Испания Кубогининг 7 карра ва Суперкубогининг 8 карра соҳиби ҳисобланади. Бундан ташқари, даҳо 4 марта ЕЧЛда, 3 мартадан УЕФА Суперкубоги ва КЖЧ мусобақаларида ғалаба нашидасини сурган. Айни паллада Месси - «Интер Майами» ҳужумчиси.
Манба: bombardir.ru, Равшан ИБРОҲИМ тайёрлади
