Машҳур ва бўйдор ҳужумчиси Энди Кэрролл Англия футболига қайтди. Фақат шуниси борки, «Ливерпуль», «Ньюкасл» ва «Вест Хэм» клублари собиқ футболчиси қайсидир профессионал жамоа эмас, балки нон-лига (ҳаваскорлар ҳудудий дивизиони) иштирокчиси «Дагенхэм энд Редбриж» билан 3 йиллик шартнома тузди. Эътиборли томони, қатарлик хусусий инвесторлар консорциуми бу клубни тўлиқ сотиб олиш бўйича келишувга эришгани билан Кэрролл таркибга қўшилди. Sky Sports хабарида айтилишича, бўйдор ҳужумчи шунинг баробарида жамоа акциядорлари қаторига ҳам кирди.
Энди Кэрролл «Бордо»даги 1 мавсумдан сўнг 36 ёшида жамоасиз қолди. Англия миллий жамоаси собиқ ҳужумчиси Франция клубининг молиявий муаммоларига қарамай, 4-даражали лига доирасидаги 23та ўйинда 11та гол урди. Мана, энди оиласига кўпроқ вақт ажратиш учун ватанига қайтди: «Дагенхэм»да иш бошлаш вақтини интиқ ҳолда кутяпман. Фарзандларим «Челси» билан шартнома тузишимни ўйлашган экан, шунчаки, «шок» ҳолатига тушиб қолишди. Муҳими, бу ажойиб вариант, ахир болаларим ёнига қайтдим. Энди улар бемалол ўйинларимни бевосита томоша қилишлари мумкин. «Бордо»да ҳаммаси ёқди, аммо оиламга кўпроқ вақт ажратишни лозим топдим».
АПЛдаги фаолиятида етарлича бойлик орттирган Кэрроллнинг таъкидлашича, буёғига пул унга мотивация беролмайди: «Футболни танлаганим ва озми-кўп пул ишлаб топганимдан бахтиёрман. Омадли инсонман. Зеро, севимли хоббим ортидан маош олдим. Чунончи, футбол мен учун ҳеч қачон иш саналмаган. Умуман, фаолиятим давомида бирор марта пул ҳақида ўйламаганман ҳам. Агар пулни биринчи ўринга қўйганимда, бемалол каттароқ суммаларни ўз ичига олган келишувларга эришишим мумкин эди. Шунчаки, футбол ичида бўлсам кифоя».
Факт. Энди Кэрролл АПЛда 3та клуб («Ливерпуль», «Ньюкасл» ва «Вест Хэм»)нинг жами 248та ўйинида иштирок этиб, 54та гол урган.
Манба: sports.ru,
Жаҳонгир МИРЗО тайёрлади
