Мавсум бошида «Челси»нинг «қора рўйхати»га кирган ва жамоадан ҳайдалган Трево Чалоба тез орада ортга қайтди ва дарҳол асосий таркибга кириб, жамоага муҳим совринларни ютишда катта ёрдам берди. Унинг асосий камчилиги - академия тарбияланувчиси эканлиги. «Челси» ўтган йили ёзда молиявий «Фейр-плэй» қоидаларига мослашиш учун ўз академияси тарбияланувчиларини бирин-кетин трансферга қўйди. Жумладан, Трево Чалоба машғулотлардан четлаштирилди, у ҳатто асосий жамоа биносига киришдан ҳам маҳрум қилинди. Лондонликлар «Атлетико»га кетишидан олдин Конор Галлахерга ҳам худди шундай муносабатда бўлишганди.
Тверо Чалоба трансферига аниқ сумма белгиланди - 25 миллион евро. Бироқ марказий ҳимоячини сотиб оладиган клуб топилмади. Фақат трансферлар муддатининг энг охирида «Кристал Пэлас» Трево масаласида ижара келишувига эришди, аммо футболчини кейинчалик сотиб олиш мажбуриятисиз. Аслида Чалоба «Челси» ихтиёридаги марказий ҳимоячилар орасида энг кучсизи эмасди, бироқ унга «академия тарбияланувчиси» мақоми халақит бергандек. Муҳими, Трево «Кристал Пэлас»да, Оливер Гласнер қўл остида чинакамига яйрай бошлади. «Пэлас» асосан 3 нафар марказий ҳимоячи билан ўйнади, Чалоба эса қанотдан жой олиб, жамоа ҳужумларини тез-тез бошлаб бериш асносида назарга тушди. «Челси» бағрига сиғмаган ҳимоячи январь ойига келиб, олдинга узатмалар сони бўйича АПЛ футболчилари орасида 5-ўринга чиқиб олди. У шунинг баробарида ҳимояда ўта ишончли кўринди. Асосийси, Трево стандарт вазиятлардан сўнг 3та гол уриб, ҳужумда ҳам ниҳоятда фойдали эканлигини исботлади.
«Челси» бу орада жароҳатланган Весле Фофанадан айрилди, камига Аксель Дисаси ҳамда Бенуа Бадяшиле ишончни оқлай олишмади. Хуллас, лондонликлар охир-оқибат Чалобани ортга қайтаришдан ўзга чора тополмадилар. Муҳими, у Энцо Маресканинг йиғинчоқ схемасига муаммосиз мос тушди. Тревога айниқса, «Челси»нинг тўпга эгалик қилган вақт 3 нафар ҳимоячи билан ўйнаш чизмасига ўтиши қўл келди. Хуллас, қувғиндиликдан қутулган Чалоба қайтишидан кейин «Челси»нинг жами 30та ўйинидан 24тасида қатнашди. У нафақат ҳимоя маркази, балки ўнг қанотда ҳам ўйнаб кўрди. Хуллас, «Челси» ЧЛдан тушиб кетган ва кейинчалик КЛ кубогини қўлга киритган оралиқда Чалоба бошланғич таркибдан ўзига жой «брон» қилишга улгурди. Англиялик футболчи шундан сўнг Клублар ўртасидаги жаҳон чемпионатининг барча ўйинларида қатнашди.
Статистикага қарасак, Трево тўпни олиб қўйиш масаласида ўртача кўрсаткич бўйича жамоада 2-юқори натижага эришди. Узатмаларнинг ўртача сони бўйича эса 5-ўринни эгаллади. Мареска ҳаттоки, клуб ўтган ёз уни қўйиб юбориб, хато қилганини ошкора тилга олди: «Трево қайтганидан буён жамоага катта ёрдам берди. У ҳар қандай ўйинда фаол тўп суришга тайёр, тажрибасини бемалол йигитлар билан бўлишяпти. Хуллас, бугунги Трево кийиниш хонасида муҳим овозга эга». Яна бир томони, ҳимоячини «Челси»даги ишидан яхши биладиган Томас Тухель ҳам уни Анлия терма жамоасига чақиришни пайсалга солмади. Трево ҳозирча Сенегал термасига қарши ўртоқлик баҳсида майдонга тушди, лекин ҳали расмий дебютини нишонлагани йўқ. Тўғри, энди бу вақт масаласи, холос. Бинобарин, Чалоба универсал футболчи - ҳимояда ишончли, олдинга силжишда фаол ва тактик жиҳатдан ҳам ақлли. Фақат унга клубнинг ёшлар тизими тарбияланувчиси эканлиги халақит бериши эҳтимоли йўқ эмас. Яъни «Челси» раҳбарияти Тревони яна трансферга қўйиши мумкин, гарчи қадрдон клубига қайтиши билан эффект берган бўлсада. Йўқ, жамоада унга нисбатан қандайдир шахсий адоват бўлиши мумкин эмас, ҳаммаси оддий бизнес...
Жаҳонгир МИРЗО тайёрлади
