Бразилиянинг «Флуминенсе» клуби аъзолари Клублар ўртасидаги жаҳон чемпионатида ўзларининг нималарга қодир эканликларини керагидан ортиғи билан исботлаб қўйишди. Жамоа бош мураббий Ренато Гаучонинг сўзларига кўра, «Флуминенсе» бошқа ярим финалчилар каби мақтанарли молиявий имкониятларга эга бўлмасада, мусобақада фақатгина башорат қилиш мумкин бўлган босқичгача етиб келишни уддалади. Шунингдек, тажрибали мутахассис финал остонасида «Челси»дан учралган мағлубиятдан сўнг ФИФА расмий сайти ижодкорлари билан кечган суҳбатда турнирдан олган таассуротлари билан ўртоқлашди.
- «Флуминенсе» КЎЖЧ ярим финалидаги Европадан бўлмаган ягона жамоа эди. Кутилмаганда бу босқичгача етиб келиш сизни қай даражада ҳурсанд қилди?
- Кутилмаганда деган иборага унчалик қўшилмаган бўлардим. Тўғри, кўпчилик муваффақиятларимизга у қадар ишонмади, лекин бунга ярим финал йўлланмаси билан жавоб қайтардик. Қарабсизки, «Флуминенсе» дунёнинг энг яхши тўрт жамоасидан бирига айланди. Мен ҳар доим шогирдларимга бугун нима қилишимиз керак бўлса шуни бажаришимиз, эртага қолдира олмаслигимизни уқтириб келаман. Чунки бундай имконият яна қачон келишини умуман билмаймиз. Хуллас, клуб тарихини қайтадан ёзишни мақсад қилгандик ва буни маълум даражада уддалай оляпмиз. Шунингдек, эришган ютуқларимиз билан тўхтаб қолмоқчи эмасмиз.
- Мусобақадаги муваффақиятли одим натижасида бош совринга эга чиқишни орзу қилган пайтингиз ҳам бўлдими?
- Биз ҳамиша орзулар билан яшаймиз, лекин улар босқичма-босқич ўзгариб туришини истисно қилмайман. Тўғри, мақсадимиз - турнирда ғалаба қозониш эди, аммо бу қанчалик қийин эканлигини ҳам билардик. Масалан «Челси» биз билан бир хил нарсани хоҳлади ва финалга чиқди (финалда «Челси» «ПСЖ»ни 3:0 ҳисобида тор-мор келтириб, турнир чемпионлигини қўлга киритди - PS). Агарда мана шу жамоа тўсиғидан ўта олганимизда эҳтимол кубок ҳақида мукаммалроқ ўйлашни бошлармидик...
- Апрель ойида «Флуминенсе»га келиб, КЎЖЧга тайёргарлик кўра бошлаганингизда, шу даражага етиша оламиз, деб ўйлаганмидингиз?
- Мен бу жамоага ҳар доим ишонганман ва биргаликда жуда кўп нарсаларни ўрганишга эришдик. Гарчи клубимиз молиявий жиҳатдан Европа клублари билан рақобатлашиши қийин бўлсада, бу уларнинг ғалаба қозонишини англатмасди. Зеро, ўйинлар майдонда ютилади ёки ютқазилади. Тўғри, кучли ва салоҳиятли ижрочиларга тўла таркиб билан ғалаба қозониш имконияти ортади, лекин энг муҳими ўйинга бўлган муносабат барибир. Масалан, Қўшма Штатларга келганимиздан бери шогирдларимга бу ерга байрам учун ташриф буюрмаганимизни тинимсиз уқтирдим. Ўзимизга бўлган ишончни ҳис қилиш ва руҳий тайёргарлик устида ишладим. Зеро, шу ерда эканмиз, демак курашишимиз, муваффақиятга эришиш учун яхшироқ тайёргарлик кўришимиз керак, деган менталитетни футболчиларим онгига сингдирдим. Натижада клуб тарихидаги энг катта муваффақиятлардан бирига эришдик.
- Жамоа етакчиси Тьяго Силванинг бу каби нуфузли турнирларда орттирган тажрибаси мусобақа давомида қай даражада қўл келди?
- Силва биз учун жуда муҳим ўйинчи. У ўз даврида Европанинг энг катта клубларида ўйнаб, улкан тажрибага эга бўлди. Бир сўз билан айтганда, Тьяго худди майдондаги мураббийга ўхшайди. У жамоадошларини тактик жиҳатдан бошқаради ва кучли рақибларга қарши ўйинларда жуда кўп фойда келтиради. Менимча, сардоримиз 40 ёшда бўлса ҳам Бразилия термаси сафида ЖЧ-2026га бориш имкониятига эга.
- Шунингдек, жамоа дарвозабони Фабио ҳам жуда ишончли ўйин кўрсатди. Агар эсингизда бўлса, футболчилик фаолиятингизни якунлаётганингизда у эндигина профессионал сифатида иккинчи мавсумини ўтказаётган эди?
- Фабио ҳақида нима ҳам дейиш мумкин? У ақл бовар қилмайдиган истеъдод эгаси эканлиги барчага маълум. Мисол учун, жаҳон чемпионатида бир неча учрашувни ўз фойдамизга ҳал қилишимизда Фабионинг ҳиссаси беқиёс. Бундан ташқари дарвозабонимиз кўплаб муҳим сейвларни амалга ошириш билан бирга жамоадошларига хотиржамликни сақлаб туришда катта ёрдам берди. Хуллас, у ҳақиқий профессионал ва жамоа етакчиларидан бири.
- Ҳужумдаги Жон Ариас-чи?
- Жоннинг ўзига бўлган ишончи ўйиндан-ўйинга ортиб бормоқда. Турнир давомида жуда кўп эътирофларга сазовор бўлгани эса унданда қувонарли. Умуман олганда, мусобақа Ариас учун ажойиб ўтди ва тобора масъулиятни ўз зиммасига олишни ўрганмоқда. Оддий айтганда, у ҳар доим рақибни ташвишга соладиган футболчилардан бири.
- Мураббий Ренатони қандай таърифлаган бўлардингиз?
- Футболчилик фаолиятимда тўплаган тажрибамни шогирдларимга ўргатишга ҳаракат қиляпман. Шунингдек, барча қарорларни ёлғиз ўзи қабул қиладиган мураббий бўлмасликка интиламан. Тўғри, охирги сўзни мен айтаман, лекин кийиниш хонасида етакчилар билан мулоқот қилиш, уларни тинглаш ва ғояларини амалга тадбиқ қилишни яхши кўраман. Агарда футболчилар мураббийлар штаби ва мен ишлаб чиққан тизимни қабул қилишса, майдонга тушганда анча эркин тўп суришади. Бизга эса, йигитларнинг ўзларини қулай ва қадрли ҳис қилишларини кўриш ёқади.
- «Флуминенсе» ушбу турнирдаги иштирок орқали дунёга қандай мессенж юбормоқда?
- Биласизми? Молиявий имконият яхши бўлса, ажойиб таркибни йиғишга ёрдам беради ва бу ўз-ўзидан шу каби нуфузли турнирларда ғалаба қозониш имкониятини оширади. Лекин майдондаги муносабат, ўйинчиларнинг фидойилиги ҳамда мураббий ва футболчилар ўртасидаги мулоқотга етадигани йўқ барибир. «Флуминенсе»нинг асосий сўзи - одамлардан Бразилия футболини ҳурмат қилишни сўрашдир. Менимча, жамоамиз «Ботафого», «Фламенго» ва «Палмейрас» билан биргаликда ушбу мундиалда миллионлар ўйини харитасига Бразилия футболини қайтаришга арзийдиган ўйин намойиш қилди.
Манба: fifa.com, Хуршид ЮСУПОВ тайёрлади
