«Ноттс Каунти» ва «Суонси»га масъул бўлган мураббий Люк Уилльямс ўтган мавсумда Чемпионшипда ўйинга тўйгач, февраль ўрталарида истеъфога чиқарилганди. Шундан кейин Люк бошқа касбдошлари каби янги жамоа топилгунга қадар телевизор қаршисида ўтиришни эп кўрмай, фойдали иш топишга қарор қилди ва аэропортда эҳтиёжманд бўлган ногирон йўловчиларга ёрдам беришни лозим топди. Спортга алоқаси бўлмаган кишилар билан мулоқотда бўлиш ҳар қандай мураббийнинг руҳий кайфиятига ижобий таъсир этишини Уилльямс яхши биларди.
Жозе Моуриньони
ўқувчилар яхши
кўришарди
Моуриньо - футбол мураббийининг ўғли. Унда ҳеч қачон пул борасида муаммо бўлмаган. Жозе болалигида ношуд ҳимоячи бўлгани сабабли университетга йўл олган ва ўқитувчи дипломига эга бўлиб, мактабда ишга жойлашганди. У ерда юқори синф қизлари Жозени севишарди. Чунки у ёқимтой йигит эди ва мактабга жуда зўр машинада келарди. Мураббийнинг ўғли жиддий, талабчан педагог эди. Шу боис, айрим ўқувчилар уни ёқтиришмасди, лекин кўпчилик ҳозир ҳам ҳурмат билан тилга олади. Мактабда Жозе жисмоний тарбия ўқитувчиси лавозимида ишлаган, кейин Сетубалнинг «Витория» ўсмирлар жамоасига сабоқ берганди.
Маурицио Сарри йиллаб кредитлар берарди
Айтишларича, Саррининг қўшнилари бошқа касбларга ортиқча эътибор бермасдан, мураббий мақомида ишлашга анча барвақт ҳаракат қилишган. Маурицио эса рафиқаси унинг ўта сердаромад ишини ташлаб, футболчилар билан шуғулланишига изн бериши учун катта иш ҳақи олар экан. Сарри дунёдаги энг кўҳна банкларнинг бирида ишлаб, Европанинг барча мамлакатларига хизмат сафарига борган ва йирик мижозларига кредитлар бериш мақсадида катта маблағ билан муомалада бўларди. 40 ёшда Сарри банк ишидан бутунлай воз кечиб, Италиянинг заиф жамоаларини бошқариб юрди. Кейинчалик «Наполи»да ишлади, «Челси» билан ЕЛда ғолиб чиқди, ҳозир «Лацио»ни бошқармоқда.
Билл Струт Эдинбургда жуда кўп девор қурган
«Ливерпул»нинг бўлажак мураббийи Боб Пейсли маъшуқасининг ота-онаси билан учрашган чоғида, ўзини ғишт терувчи уста, деб таништирганди. У даврда футболчиларни келажаги порлоқ куёвлар ҳисоблашмасди. Пейсли девор тиклашни биларди, лекин қўшимча маблағ топиш зарурати бўлса, ишларди. «Рейнжерс» афсонаси бўлмиш Струт эса туғма қурувчи. Унинг отаси ғишт терган, Билл эса Эдинбургда жуда кўп деворларни тиклаган, шунингдек, югуриш спорти билан шуғулланган. Бундан воқиф бўлган «Рейнжерс» мураббийи Уилтон уни ўз жамоасига жалб этганди. Билл унинг садоқатли шогирди эди. Бироқ тез орада устози яхтадан сувга йиқилиб, вафот этганди. Унинг ўрнини эгаллаган Струт «Рейнжерс» билан 30та совринни қўлга киритган.
Хорхе Сампаоли банк кассачиси эди
Ўз даврида Сампаоли болаликдаги жиддий жароҳати туфайли Мессининг қадрдон клуби бўлган «Ньюэллс Олд Бойз»нинг ўйинчиси бўла олмаганди. Натижада аввалига олий маълумоти бўлмаган Хорхе 15 йил банкда кассачи вазифасини бажарди, клерк лавозимида қўшимча маош олди. Қисқаси, профессионал футболдан йироқ бўлди. Кейинчалик Хорхе камтарин жамоаларни бошқара бошлади. Бир куни ўйиндан четлатилган мураббий стадионни тарк этиб, ўйинни кўчадаги дарахт устида қора кўзойнак билан томоша қилганди. Кимдир уни суратга олиб, газетада чоп этганди - мухлислар ёш мураббийни шу тариқа таниб олишганди. Сампаоли жисмоний тарбия ўқитувчиси дипломига эга бўлди, лекин фақат кассачи ва клерк сифатида ишлаганди.
Арриго Сакки узоқ вақт пойафзал сотган
Йохан Кройфф билан биргаликда энг замонавий футбол услубини кашф этган инсон - кейинчалик уларнинг ғояларини Анчелотти ва Гвардиола мослаштиришган, профессионал ўйинчи бўлмаган. Унинг фалсафаси қуйидагича: тойчоқни машқ қилдириш учун тулпор бўлиш шарт эмас. Ҳаёти футбол билан боғлиқ бўлишини Арриго болалик чоғидан орзу қилган, бироқ профессионал жамоалар танловидан ўта олмаганди. Моуриньо энг ношуд ўнг қанот ҳимоячиси бўлса, Сакки чап қанотда ёмон ўйнаганди.
Арригонинг отасида пойафзал тикиш устахонаси ва мўъжазгина дўкончаси бор эди. Ҳисобчи дипломига эга бўлган Сакки ана шу дўконда сотувчилик қилиб, параллел равишда мураббийлик касбини эгаллашга интилди ва «Чезена» клубидан жой олди.
Жерар Улье инглиз тили ўқитувчиси бўлиб ишлаган
Моуриньодан фарқли равишда, Жерар Улье футбол мураббийининг ўғли бўлмасада, у ҳам мактабда ишлаган. «Ливерпул»нинг бўлажак мураббийи педагогик маълумот олиб, кейин тажриба алмашиш дастури бўйича Англияга йўл олган ва ҳаваскорлар клубида тўп сурганди. Ўз юрти бўлмиш Францияда Улье инглиз тили ўқитувчиси бўлиб ишлади. Таажжубки, «Ланс», «ПСЖ» ва Франция терма жамоасидаги фаолиятдан кейин Жерар «Ливерпул»да пайдо бўлди. У ерда Улье «қизиллар»ни юксак савияга олиб чиқди, 6та совринни қўлга киритди ва Жеррард билан жамоанинг жанговар руҳини шакллантирди. Кейинчалик унинг ишланмаларини пухта ўзлаштирган Рафаэль Бенитес «қизиллар» билан ЕЧЛда ғолиб чиқди. Афсуски, Улье жуда барвақт фаолиятини якунлади, кейин узоқ вақт беморлик азобини бошдан кечирди ва 2020 йилда вафот этди.
Жуан Салданья спорт журналисти эди
Салданья 6 ёшли пайтида партизанлар учун чегарадан қурол етказиб берган контрабандист бўлганди. Кейинчалик Жуан ҳуқуқшунослик йўналишида таҳсил олди, лекин бу касбдан воз кечиб, спорт журналисти мақомида иш юрита бошлади ва «Ботафого» клуби эътиборини тортди. Дарвоқе, яқинда ана шу жамоа КЖЧда «ПСЖ»ни маҳв этди, 1950-йилларда эса журналист Жуанни маслаҳатчи сифатида ишга олганди. Тез орада мураббийлик лавозимини эгаллаган Салданья штат чемпиони бўлди, лекин Дидини «Реал»га сотиб юборгани учун норози бўлиб, «Ботафого»ни тарк этди. Бир неча йилдан кейин Жуанни яна мураббийликка қайтаришди. У Бразилия терма жамоасини 1970 йилдаги ЖЧга тайёрлади. Бироқ Пеле чемпионлик унвонига Салданья эмас, Загалло раҳбарлигида эришди. Чунки Жуан Бразилиянинг фашистпараст ҳукуматини танқид қилган ва лавозимидан четлатилганди.
Манба: soccer.ru, А.АБДУВАЛИХЎЖАЕВ тайёрлади
