Франция терма жамоаси ЖЧ-2026 финал босқичига чиқиш мақсадига эришиш учун ўз йўлида давом этмоқда. Дидье Дешам жамоаси саралаш цикли стартида Украина (2:0) ва Исландия (2:1)ни мағлуб этди. 10 октябрь куни гуруҳ аутсайдери Озарбайжон билан ўз майдонидаги ўйинда ҳам ғалаба қозонди. Голларни Килиан Мбаппе, Адриен Рабьо ҳамда Флорьян Товенлар киритишди. «Уч ранглилар»да ҳаммаси барқарор, фақат Париж клубидан чақирилган футболчиларнинг жароҳатлари туфайли «ПСЖ» билан зиддиятни айтмаса... Бироқ, Дешам барибир барчани ҳайратда қолдирди - нақ 6 йилдан сўнг унутилган ЖЧ-2018 чемпионини жамоага қайтарди!
Ҳа, биз Флорьян Товен ҳақида гаплашамиз. Ушбу ҳужумкор ярим ҳимоячи ҳеч қачон супер юлдуз бўлмаган, аммо «Марсел»да 7 унутилмас мавсум ўтказган. Провансалликлар билан Европа Лигаси финалигача етиб борди, ўша пайтда катта пулга (18,3 млн. евро) «Ньюкасл»га сотилди. Аммо Англияда ўйнаб кета олмади ва тезда Францияга қайтди. Статистикага кўра, у ўзининг энг кучли йилини 2017|2018 йилги мавсумда жаҳон чемпионатидан олдин, Лига 1 ва муваффақиятли Европа Лигасининг 37 ўйинида 25+13 очко тўплаган. Дешам шундай кўрсаткичга эга Товенни (чемпионатнинг энг яхши ўйинчиси мукофотига асосий номзод) эътиборсиз қолдиролмасди. Ва уни Россияга олиб кетди.
Умуман олганда, Флорьян Франциянинг ўсмирлар ва ёшлар терма жамоаларида анча машҳур эди. Аммо у асосий терма жамоада фақат 24 ёшида - 2017 йилнинг ёзида дебют қилади. ЖЧ-2018га қадар Парагвай, Уэльс, Колумбия ва Италия билан ўртоқлик учрашувларида иштирок этди. Турнирнинг ўзида эса ҳужумкор ярим ҳимоячининг ғалабага қўшган ҳиссаси минимал эди. Товен Аргентина билан ўтган 1|8 финал ўйинида Килиан Мбаппе ўрнига тушди ва майдонда 5 дақиқа ўтказди. Қолган ўйинларни захира ўриндиғидан томоша қилди. Аммо шунга қарамай, ҳеч ким Флорьян унвонини тортиб ололмайди - у жаҳон чемпиони.
Шундан сўнг Товен яна бир йил давомида Франция терма жамоасига чақирилди. Миллий жамоадаги ўйинлари сонини 10тага етказди. Исландия, Уругвай ва Боливия билан ўртоқлик ўйинларида, Молдовага қарши Евро-2020 саралаш ўйинида иштирок этди. Ва ўзининг Европа чемпионати саралаши доирасидаги Андорра билан сўнгги ўйинида ўзининг биринчи самарали ҳаракатларни амалга оширди - 1+1. Мбаппенинг пасини голга айлантирди. Бу 2019 йилнинг июнида эди.
Кейин Дешам Товен ҳақида унутди. Гап шундаки, Флорьян голеностопдаги жароҳати туфайли деярли 2019|2020 йилги мавсумни ўтказиб юборди. Тикланишдан кейин эса 2018 йилгидек яхши кўринмади. 2021 йилнинг июлда у «Тигрес» билан шартнома имзолаб, Мексикага кўчиб кетди. Ҳужумкор ярим ҳимоячи «тўқ йўлбарс»га айланди, Дешамга эса терма жамоада «оч шерлар» керак эди. «Тигрес»да ўтган бир ярим мавсумда Товен 38 ўйинда атиги 8+5 натижа кўрсатди.
2023 йилнинг январида Флорьян Европага қайтди, лекин ватанига эмас. Французга «Удинезе»дан 2,5 йиллик шартнома таклиф қилинди ва Товен «А» Серияни забт этиш мақсадида Италияга кетди. Бироқ, дастлаб у ҳатто асосий таркибга ўрнашиб ололмади. 2022|2023 йилги мавсумнинг иккинчи ярмида эса Италия чемпионатида 16та ўйин ўтказди. Кейинги йил «А» Сериянинг 29 ўйинида 5+3 натижа кўрсата олди. Ўтган мавсумда эса Флорьян сардорлик боғичини олди, 25 ўйинда 8та гол ва 3та ассист қайд этди. Мавсум март ойининг ўрталарига қадар яхши кетаётганди, аммо у яна жароҳат олди.
Жорий йил августида Товен 4 йиллик саёҳатдан сўнг Францияга қайтди. «Ланс» уни «Удинезе»дан 6 млн. еврога сотиб олиб, 3 йиллик шартнома тузди. Орлеанлик «жангчи» Лига 1га футболни якунлаш учун келган, чунки 3 ойдан кейин у 33 ёшга тўлади. Бу ёшда ва бундай шароитда Франция терма жамоасини орзу қилиб бўлмайди. Агар клуб билан шартномани муносиб равишда оқлаб бера олсангиз ҳам бу яхши натижа.
Ва тўсатдан - Дешамдан қўнғироқ! Миллий жамоага кутилмаган таклифни изоҳлар экан, Товен шундай деди: «Бир пайтлар мен Франция терма жамоасидан шунчалик узоқда эдимки, вазиятни реал баҳолашим керак эди. Аммо, ростини айтсам, футболчи экансиз, уни доимо юрагингизда сақлайсиз, айниқса, агар миллий жамоа учун ўйинларда қатнашган бўлсангиз. Ажабланарлиси шундаки, бу менинг биринчи чақирувим бўлмаса-да, ўзимни биринчиси каби ҳис қиляпман, чунки мен жуда қийин дақиқаларни бошдан кечирдим. Демак, бу туйғу шундан».
Қизиғи шундаки, дастлаб Дешам Товенни фақат Озарбайжон ва Исландия билан ўйинлар учун кенгайтирилган таркибга киритганди. Бироқ, Флорьян якуний қайдномага кирмади. «ПСЖ»нинг навбатдаги ўйинчиси - бу сафар Брэдли Барколя жароҳатланганлиги аниқлангач, Дешам Товенга қўнғироқ қилиб, унга жамоада эканлигини айтди.
Қизиқарли тафсилот: Франция Федерациясининг Барколя жароҳати ҳақидаги баёнотидан сўнг, «ПСЖ» яна шов-шувга сабаб бўлди. Париж клуби ОАВда Брэдлининг соғлиғи ҳақида эълон қилинган пресс-релиздан ҳайратда қолганини таъкидлаб, баёнот берди. Франция чемпионларининг сўзларига кўра, уларнинг тиббий хизмати Федерацияга сурункали сон мушаклари муаммоси ҳақида ҳеч қандай маълумотга эга бўлмаган тиббий хулосани юборган. «Тиббий сирни барча томонларнинг манфаати учун кузатиш керак», - деб таъкидлади «ПСЖ». Бу Товенга қўнғироқ қилишга ҳожати йўқлигини англатадими?
Қандай бўлмасин, Флорьян 6 йил 4 ойдан кейин яна Франция терма жамоасида ўйнаш имкониятига эга бўлди. Миллий жамоа тарихида бундай узоқ танаффуслар кам бўлган. Дешамдан, албатта, нима учун Товенни чақиргани сўралган. Дидье буни шундай тушунтирди: «Мен танлов қилиш учун шу ердаман. Ва у яхши ҳолатда».
Товен Лига 1нинг жорий мавсумида «Ланс» учун 7 ўйин ўтказди ва 2та самарали ҳаракатни амалга оширди - «Брест» ва «Лилл» дарвозалари ишғол этилди. У ўзининг янги жамоаси таркибида зарбалар сони (10) ва бошқа аниқ паслар (69) бўйича энг яхшиси, зарбага паслар (15) ҳамда фол ишлаш бўйича иккинчи (12), зарбалар (11) ва аниқ зарбалар бўйича эса учинчи (5). Бу фақат рақамлар эканлиги аниқ, аммо уларнинг ортида чемпионлик тажрибаси ҳам бор.
Товеннинг ўзи тан олишича, ҳозир у ўзини ЖЧ-2018га қараганда босиқроқ ва шу билан бирга мақсадлироқ ҳис қилмоқда. Дешамнинг ишончини оқлашни жуда хоҳлайди. Шундай бўлди ҳам, у Озарбайжон билан ўйин тугашига 7 дақиқа қолганида Мбаппе ўрнига майдонга туширилди ва ўша заҳоти Тео Эрнандеснинг пасини чиройли голга айлантирди.
«Ланс» ҳужумкор ярим ҳимоячиси Флорьян Товен Франция чемпионатида ойнинг энг яхши футболчисига айланди. Ўтган ойда 32 ёшли вингер Лига 1нинг 3та ўйинида қатнашиб, битта гол урди. Бугунги кунга келиб, «Ланс» 13 очко билан турнир жадвалида 6-ўринда бормоқда. Флорьян жорий мавсум 7та ўйинда 2та гол урди ва 2та сариқ карточка олди.
Манба: championat.com, М.ПЎЛАТОВ тайёрлади
