Бир вақтлар буюк бўлган «Скуадра Адзурра»ни Женнаро Гаттузо қутқариши шарт. Обдан ўйлаб, чуқур мулоҳаза қилиб кўринг: Италияда ўз терма жамоасини бирор марта ЖЧда кўрмаган авлод деярли вояга етди. Мураккаб вазиятга тушиб қолган маҳаллий мансабдорлар бу масалада жиддий бош қотиришиб, Женнаро Гаттузо миллат футболининг халоскори бўлиши керак, деган қарорга келишди.
Апенниндагилар табиийки, шок ҳолатидалар. Ижтимоий тармоқлар қутурмоқда: буюк «Скуадра Адзурра» тобутининг қапқоғи учун сўнгги мих!... 12 йиллик мураббийлик фаолиятида Женнаро 9та клубни... алмаштиришга улгурди. Шу давр ичида атиги 2та жамоа билан бирмунча муваффақиятли натижага эришди: «Милан» билан 5-ўринни эгаллади, «Наполи» билан Италия Кубогини қўлга киритди.
Қадрдон терма жамоа бошқарувига эса, Гаттузо сўнгги мавсумда чемпионликка асосий даъвогар бўлган, лекин якуний босқичда совринни бой бериб, бронза медаллари билан кифояланган Хорватиянинг «Хайдук» клубидан ўтди. Очиғини айтганда, бирон-бир асосли сабабсиз жамоани шу қадар кескин тарзда алмаштирган мутахассисни кўриш тугул, ҳатто эслашнинг ўзи ҳам жуда қийин. Бироқ бу масалада Женнаронинг умуман, алоқаси йўқ. Италия ФФ ихтиёрида бошқа вариантнинг ўзи йўқ эди.
Бу ташхис - ҳурматли мутахассисларнинг ҳеч бири Италияни бошқаришни истамайди. Гаттузо эса, Раффаэле Палладино, Винченцо Итальяно ва бошқа истиқболи порлоқ мураббийлар билан таққослаганда, бир қатор устунликка эга. Буни айниқса, футбол мансабдорлари яхши биладилар.
Биринчидан, жамоани қисқа вақт ичида жанговар ҳолатга келтириш учун керак бўладиган харизма ва дадиллик. Иккинчидан, юксак нуфуз ва Женнаро ўз шогирдларига юқтириши мумкин бўлган чемпионлик ДНКси. «Милан»нинг 2000-йиллардаги афсоналари жамоанинг ўша даврдаги энг ёрқин етакчиси айнан Гаттузо бўлганлигини ҳозир ҳам тан оладилар. Яъни, жамоада ҳамма зўр ўйин кўрсатган, лекин ҳар қандай рақибни маҳв этишга каркидон юракли баджаҳл етакчи мажбур этган экан.
Эҳтимол, бу сафар Женнаро ўз шогирдлари билан ўта жўшқин алоқа ўрнатишга муваффақ бўлар. Бу «Хайдук» ҳам, «Валенсия» ва «Марсель» ҳам эмас - бу ерда 2006 йилдаги жаҳон чемпиони бўлган Гаттузо ўша даврда унинг ўйинларига мафтун бўлган болакайларни бошқаради. Қолаверса, терма жамоадаги иш услуби клубларникидан фарқ қилади.
Бироқ Италияда барибир, муқобил номзод топилгандай бўлганди - Криштиану Роналду «Ал-Наср»дан сиқиб чиқарган Стефано Пиоли. Бу мураббий жамоани бирлаштириш санъатини «Милан»да намойиш этганди, Гаттузо эса тактика бобида унга тенглаша олмайди. Мансабдорлар унинг қайси жиҳатидан шубҳаланишгани бизга маълум эмас. Бизнингча, Пиоли - «Скуадра Адзурра» учун оптимал вариант эди. Аммо якунда шартнома Женнарога берилди. Стефано эса «Фиорентина» билан чекланишга мажбур.
Гаттузонинг бугунги муҳим вазифаси - жамоани ЖЧ-2026 йўлланмасини қўлга киритиш учун етарли ғалабаларга эриша оладиган даражага олиб чиқиш.
Манба: sovsport.ru, Содиқ СОБИР тайёрлади
