Канте ҳам «Ал-Иттиҳод» ўйинчиси!

Инсайдер Фабрицио Романонинг ёзишича, 32 ёшли франциялик футболчи эркин агент сифатида «Ал-Иттиҳод» клуби аъзосига айланган. Томонлар яна бир йилга узайтириш шарти билан 2 йиллик шартномани имзолаган. Канте Лондоннинг ўзида тиббий кўрикдан ўтган. Футболчи июль ойида Саудия Арабистони клуби сафига бориб қўшилади. Қайд этилишича, Кантенинг Саудия Арабистонидаги йиллик маоши имидж ҳуқуқи даромади билан бирга қарийб 100 миллион еврога етади. Аввалроқ, «Ан-Наср» ва «Ал-Иттиҳод» клуби вакиллари Канте билан Лондонда учрашиб, музокара ўтказаётгани ҳақида хабар қилинганди. Футболчи Ар-Риёд эмас, Жидда шаҳри жамоасини танлаган. Куни кеча Кантенинг миллий жамоадаги шериги Карим Бензема ҳам жиддаликлар сафига ўтганди. Маълумот учун, 32 ёшли хавбекнинг «Челси» билан амалдаги келишуви июнь ойи якунида тугайди. У ўтган мавсумда Премьер-лигада 7та ўйин ўтказиб, битта голга ассистентлик қилди.