«Тоттенхэм» ўйинчилари Контега қарши

АПЛ сўнгги турида «Тоттенхэм» турнир аутсайдери «Саутгемптон» меҳмони бўлиб, сўнгги дақиқаларда 3:1 ҳисобида ғалабани қўлдан чиқарди. Ўйиндан (3:3) кейин лондонликлар бош мураббийи Антонио Конте қўл остидаги ўйинчиларни танқид қилиб, уларни худбинликда айблаганди. Sky Sports хабарига кўра, ушбу интервьюдан кейин жамоадаги ички муҳит бузилган. Аксарият ўйинчилар мураббийнинг матбуот анжуманида ҳаддидан ошган деб ҳисобламоқда ва унинг ҳозироқ клубдан кетиши тарафдори. The Guardian нашри ҳам Конте ва ўйинчилар ўртасидаги муносабатларга дарз кетганини тасдиқламоқда. Қайд этилишича, жамоа таркибида унинг қўл остида тўп суришга шай бўлган ўйинчилар саноқли. Асосий таркибнинг аксарияти Конте клубдан кетишини истамоқда. Аввалроқ, Конте «Тоттенхэм»да ўйинчиларнинг ғолиблик учун курашда иродаси етишмасликда, бу жамоа неча йилдан буён соврин юта олмаётганига футболчилар кўникиб қолгани ҳақида гапирганди. Маълумот учун, «Тоттенхэм» АПЛда 28 ўйиндан кейин 49 очко жамғариб, 4-ўринда бормоқда.