Ли Кан Ин узр сўради

Гап шундаки, терма жамоа овқатланаётган пайтда стол тенниси ўйнаб, шовқин кўтарган ёш футболчиларга танбеҳ бермоқчи бўлган Сон Хюн Минга «ПСЖ» футболчиси Ли Кан Ин қўл кўтаришга уринган ва якунда Соннинг қўли шикастланганди. Ушбу ҳолатга вазиятнинг асосий қаҳрамонларидан бири Ли Кан Ин муносабат билдирди ва барчадан узр сўради: «Салом. Бу Ли Кан Ин. Осиё кубоги ярим финал ўйинидан олдин Сон Хюн Мин билан жанжаллашганимиз ҳақидаги янгиликларни кўрдим. Футбол мухлисларининг хафсаласи пир бўлишига сабабчи бўлдик. Бундан жуда афсусдаман. Мен ўша вазиятда ўзимни қўлга олишим ва акаларим айтган гапларга қулоқ солишим керак эди. Афсуски, мен ўзимни ёмон томондан кўрсатдим. Кимни ҳафа қилган бўлсам, улардан узр сўрайман. Мухлислар мендан нима кутишларини яхши англайман. Бугундан бошлаб жамоадаги дўстларимга ёрдам беришга, энг яхши футболчи ва инсон бўлишга ваъда бераман». Маълумот учун, Жанубий Корея термаси Осиё кубоги ярим финал ўйинида Иорданияга имкониятни бой бериб, мусобақа билан хайрлашганди.