Мендешнинг «ПСЖ»га тавсиялари...

Таниқли футбол агенти Жорже Мендеш парижликларга ўзининг энг кучли мижозларини таклиф қилмоқда. Португалиялик мутахассис биринчи навбатда «Милан» тўпурари Рафаэл Леауни «ПСЖ»га олиб ўтмоқчи. Леау миланликлар билан шартномасини янгилаганига қарамай, бу масалани 100 миллион еврога ҳал қилса бўлади. Боз устига, «россонерилар» вингери «А» сериянинг 35-тури доирасидаги «Женоа»га (3:3) қарши уй учрашувининг 67-дақиқасида алмаштирилди. Леау мухлислар ҳуштакбозлиги остида майдонни тарк этди. Уларнинг муносабати португалияликни ранжитди: у дарҳол кийим алмаштириш хонасига кетди. «Милан» мухлислари апрель ойида Европа Лигаси чорак финалининг биринчи ўйинида «Рома»га қарши ўйинда (0:1) Рафаэлдан норози бўлишганди. Қолаверса, «Милан»нинг мухлислар секторидаги ультраслари ёзги трансферлар ойнаси олдидан клубдан аниқ стратегия талаб қилиб, бутун учрашув давомида жим туришди. Мухлислар финал ҳуштаги янграшига 10 дақиқа қолганида «Сан-Сиро»ни тарк этиб, битта баннер қолдиришди: «Жимлик овози». Парижликларга тавсия қилинаётган юлдузлар орасида «Манчестер Юнайтед»дан Бруну Фернандеш, «Манчестер Сити»дан Бернарду Силва ҳамда «Вулверхэмптон»дан Педру Нетулар бор. Айни пайтда «ПСЖ»да ўйнаётган олти футболчи - Барколя, Асенсио, Витинья, Рамуш, Угарте ва Заир-Эмери айнан Жорже Мендешнинг мижозлари ҳисобланишади.