Нойер ва Мусиалада рекорд!

Коста-Рика билан ўйин Германия терма жамоаси сардори учун жаҳон чемпионатидаги 19-ўйин бўлди. Бу дарвозабонлар ўртасидаги турнирдаги энг кўп ўйиндир. Бу кўрсаткич бўйича Нойер Зепп Майер ва Клаудио Таффарелни ортда қолдирди.

Немислар ярим ҳимоячиси Жамол Мусиала рақиб жарима майдонида 24 марта тўпга тегинди ва мазкур натижа бўйича ЖЧ рекордини ўрнатди. 19 ёшли хавбек жорий мундиалнинг барча 3 ўйинда майдонга тушди ва битта ассистга эришди.

Германия терма жамоаси етакчиларидан бири Томас Мюллер эса Қатардаги жаҳон чемпионатини ёмон статистика билан тарк этадиган бўлди. У гуруҳ босқичи доирасида бўлиб ўтган 3та ўйинда иштирок этиб, нафақат гол ура олмади, балки рақиблари дарвозаси томон бирорта ҳам аниқ зарба йўллай олмади. Мюллер Япония ва Испанияга қарши баҳсларда зарба йўллашга муваффақ бўлмаган бўлса, кеча бўлиб ўтган Коста-Рикага қарши учрашувда 3та зарба йўллашга уринди - барчаси ноаниқ. Бундан ташқари, Томас Мундиал доирасида сўнгги 7та ўйинда гол ура олмади. Ваҳоланки, германиялик футболчи ўзининг аввалги 12та ўйинида 10та гол уришга муваффақ бўлганди.