Оддий хато, фақат МЛС расмий аккаунтидан...

Фақат шуниси борки, испаниялик футболчиларни адаштириб юборди. Учраб турадиган оддий хатолик, аммо бу чалкашлик жаҳон футболида шов-шув кўтаришда араблардан қолишмасликка уринаётган лиганинг расмий аккаунтига тегишли...

MLSнинг «Твиттер»даги расмий саҳифасида «Интер Майами» сафига қўшилиб, дебют қилишга ҳам улгурган Серхио Бускетс чиройли таъриф билан таништирилди: «Бу йигит фақат ғалаба учун ишлайди!» «Барселона»нинг толмас собиқ футболчисига муносиб баҳо. Хабарнинг чап томонида - футболчи фотосурати, ўнг тарафда - унинг сов­ринлари узун рўйхати. Аммо сурат Серхио Бускетсники эмас, балки Испания миллий термасининг собиқ ҳимоячиси Альваро Арбелоаники. Бу кадр 2010 йилги жаҳон чемпионати финалидан сўнг олинган бўлиб, ўшанда испанлар Андрес Иньестанинг қўшимча дақиқаларда урган ягона голи эвазига ғалаба қозонишганди. 

Аслида хатоликни тушуниш мумкин, чунки маълум бир суратларга қарасангиз, Бускетс ва Арбелоа чиндан ҳам, бир-бирларига ўхшашади. Эслатма, Серхио жорий ёз эркин агентга айлангач, узоқ вақт янги клуб масаласида бир тўхтамга келолмади. Кейин дўсти ва «Барселона» бўйича со-биқ клубдоши Лио­нель Месси ортидан Дэвид Бекхэмнинг «Интер Майами»си чорловини қабул қилди. Бир қарашда, испаниялик ярим ҳимоячи учун бошқа йўналиш ҳам йўқ эди, гўё. Маълумот учун, Бускетс ва MLS клуби ўртасидаги шартнома 2025 йилгача мўлжалланган.

Д.АЛИМОВ тайёрлади